INAGURASION
Panangisibbo iti maysa a patakder, panangirugi iti maysa nga urnos, wenno damo a panangaramat iti maysa a disso buyogen dagiti nadaeg a seremonia. Ti “inaguraran” naipatarus manipud iti Hebreo a berbo a cha·nakhʹ (nombre a porma, chanuk·kahʹ), no kaipapananna ti “pormal nga isibbo, idedikar,” ken manipud iti Griego a berbo nga en·kai·niʹzo, a kangrunaan a kaipapananna ti “pabaruen, wenno iyam-ammo kas kabbaro,” kas babaen iti dedikasion. Ti Hebreo a sao a neʹzer, nasantuan a pagilasinan ti dedikasion, ket nausig iti sidong ti suheto a DEDIKASION.
Idi mangrugi a maipaannurot ti Mosaiko a Linteg, sidadaeg a naisibbo dayta babaen kadagiti maikanatad a seremonia a pakairamanan dagiti animal a sakripisio ken ti pannakaiwarsi ti dara iti rabaw ti altar, iti libro, ken kadagiti umili. Daytoy a pasamak ket tinukoy ni apostol Pablo kas tignay a pananginagurar iti dayta a tulag.—Ex 24:4-8; Heb 9:18-20.
Iti sasao ni Pablo nga “uray daydi immuna a tulag saan a nainaguraran [porma ti Gr. en·kai·niʹzo] nga awan dara” (Heb 9:18), ipatuldona a kasta met laeng ti pannakaipatungpal ti baro a tulag—a nainaguraran babaen ti ipapatay ken pannakapagungar ni Jesus ken ti iyuulina idiay langit, a sadiay indatag ni Jesus ti pateg ti natauan a biagna ken manipud sadiay imparukpokna kalpasanna ti nasantuan nga espiritu kadagiti adalanna. Yantangay napagungar ni Jesu-Kristo iti espiritu, aktual a makastrek iti pudpudno a “nasantuan a disso,” ti langlangit iti saklang ni Jehova, ket babaen ti subbot a sakripisiona mapagbalinna a posible ti iseserrek met dagiti napulotan a pasurotna idiay langit. Gapuna maikuna nga inrugina, inyam-ammona kas kabbaro, wenno inaguraranna ti dalan nga agturong iti langlangit, a dayta a probision aramaten ti sabsabali kalpasanna.—Heb 10:19, 20.
Mabasatayo met ti maipapan kadagiti nadaeg a seremonia mainaig iti datdaton dagiti panguluen ti tribu iti inagurasion ti altar ti tabernakulo idiay let-ang. (Nu 7:10, 11, 84-88) Adda naisangsangayan nga asamblea maipaay iti inagurasion ti templo ni Solomon ken ti adda iti dayta a dakkel nga altar ti sakripisio.—1 Ar 8:63; 2Cr 7:5, 9.
Idi nabangon manen ti templo iti sidong ni Zorobabel kalpasan ti pannakaidestiero idiay Babilonia, adda dagiti nadaeg a seremonia ti panangisibbo a kadagita ginasut nga animal ti naisakripisio. (Esd 6:16, 17) Idi agangay, dagiti pader iti aglikmut ti nabangon manen a Jerusalem naisubli iti sidong ti panangiwanwan ni Nehemias, ket naangay manen ti nagarbo a piesta ti inagurasion, buyogen ti dua a dadakkel a koro ti panagyaman a nakiraman iti panangidaydayaw ken Jehova.—Ne 12:27-43.
Mainayon kadagitoy a makapasiddaaw a nasional a seremonia ti inagurasion, mabasatayo ti maipapan iti maysa a tao a mangin-inagurar, wenno mangisibsibbo, iti balayna (De 20:5), ket ti paulo ti Salmo 30, a naikuna a pinutar ni David, awaganna dayta kas “Kanta ti inagurasion ti balay.”
Idi nairingpas ni Nabucodonosor ti pannakaipatakder ti nakadakdakkel a ladawan a balitok iti Tanap ti Dura, inayabanna a sangsangkamaysa dagiti amin a satrapa, prepekto, gobernador, manangbalakad, tesorero, ukom, mahistrado ti polisia, ken amin nga administrador dagiti masaksakupan a distrito maipaay iti makapasiddaaw a seremonia ti inagurasion. Iti kasta ninamnama ni Nabucodonosor a mapagkaykaysana amin nga iturayanna maipaay iti panagdaydayaw. Dagiti tallo nga agtutubo a Hebreo nga adda iti daytoy a pasamak nagkitakitda a mangikompromiso iti panagdaydayawda ken Jehova babaen ti pannakiraman iti daytoy a relihion ti nasion.—Da 3:1-30.
Agingga itoy nga aldaw, tinawen a ramrambakan dagiti Judio ti awaganda a Hanukkah iti bulan ti Disiembre. Panglaglagip daytoy iti piesta ti inagurasion (Heb., chanuk·kahʹ) a naisaruno iti panangdalus ni Judas Macabeo iti templo idi 165 K.K.P. kalpasan a minulitan dayta ni Antiochus IV Epiphanes.—Jn 10:22; kitaenyo ti PIESTA TI DEDIKASION.