ISLA

Ti Hebreo a termino nga ʼi (pangadu a porma, ʼi·yimʹ) saan laeng nga agaplikar iti maysa a daga a basbassit ngem iti kontinente ken naan-anay a napalikmutan iti danum (Isa 11:11; 24:15) no di ket tumukoy met iti namaga a daga (Isa 42:15) wenno (dag)daga iti igid ti baybay. (Isa 20:6; 23:2, 6; Jer 2:10) Iti piguratibo a pamay-an, ti sao nga ʼi agaplikar kadagiti agnanaed iti kakasta nga isla wenno dagdaga iti igid ti baybay. (Ge 10:5, Rbi8 ftn; Isa 49:1, Rbi8 ftn; 59:18, Rbi8 ftn) No dadduma “dagiti isla” irepresentarda ti kaadaywan a luglugar ken dagiti agnanaed kadagita. (Isa 41:5; 66:19; Eze 39:6; kitaenyo ti MAGOG Num. 2.) Gapuna awan ti nakaad-adayo unay wenno naiputputong, kas kadagiti isla iti baybay, tapno makalisi kadagiti ibunga ti simboliko a ginggined iti Babilonia a Dakkel. (Apo 16:18-21; idiligyo ti Apo 6:12-14.) Manipud panangmatmat ni Jehova, dagiti amin nga isla kaslada “napino laeng a tapok.”​—Isa 40:15.

Karaman kadagiti isla nga espesipiko a nainaganan iti Biblia isu ti Chipre (Ara 13:4-6), Cos, Rodas (Ara 21:1), Creta (Ara 27:7), Cauda (Ara 27:16), Malta (Ara 28:1), ken Patmos (Apo 1:9).