JABIN

[mabalin a, Makailasin; Makaawat; wenno, Daydiay Agibangon].

Nalabit maysa a nagan wenno titulo ti maysa a dinastia dagiti Canaanita nga ar-ari ti Hasor.

1. Ti ari ti Hasor idi rinaut ni Josue ti Naikari a Daga. Nangbuangay ni Jabin iti panagkakappon dagiti Canaanita nga ar-ari iti amianan, ket maysa a puersa “a nakaad-adu kas kadagiti binukel ti darat . . . [agraman] adu unay a kabalio ken karuahe a pakigubat” ti inurnongda maibusor iti Israel. Idi nagpakarsoda iti dandanum ti Merom, naabak dagiti nagtitipon a buyotda babaen ti kellaat nga idadarup ken panangkamat kadakuada ni Josue. Napapatay ni Jabin idi nakautibo a mismo ti Hasor ken napuoran idi agangay.​—Jos 11:1-14; 12:7, 19.

2. Maysa pay a Canaanita nga ari idi agangay, a nagturay manipud iti naibangon manen a Hasor; nalabit kaputotan ti Num. 1. Ni Jabin ket naawagan nga “ari ti Canaan” a dayta ti nalabit mangipasimudaag a nabilbileg ngem iti sabsabali pay a Canaanita nga ar-ari, a namagbalin kenkuana a kabibilgan ken katuturayan; agparang nga adda dadduma pay a nakialiansa kenkuana. Iti sabali a bangir, mabalin a dayta nga awag ket mangipakita laeng nga isu ket naiduma iti ar-ari ti dadduma a daga. Ti buyot ni Jabin, agraman ti 900 a karuahe nga addaan kadagiti panabas a landok, ket adda idi iti sidong ti panangidaulo ni Sisera, nga adayo a nalatlatak iti salaysay ngem ni Jabin a mismo.​—Uk 4:2, 3; 5:19, 20.

Pinalubosan ni Jehova a siuulpit nga inrurumen ni Jabin ti apostata nga Israel iti 20 a tawen. Ngem idi immawagda iti Dios maipaay iti pannakaispal, insaad ni Jehova da Barak ken Debora a mangidaulo iti Israel iti panagballigi maibusor iti buyot ni Jabin. Ni Sisera ket pinatay ti asawa ni Heber a Keneo, a pagayam ni Jabin. (Uk 4:3-22) Nagtultuloy a nakigubat dagiti Israelita ken Jabin ket pinapatayda idi agangay.​—Uk 4:23, 24; Sal 83:9, 10.