JAEL

[Kalding iti Bantay].

Ti asawa ni Heber a Keneo, ngarud saan nga Israelita, ken ti nangpapatay iti Canaanita a panguluen ti buyot a ni Sisera.

Nagtolda ni Jael ken ti asawana iti asideg ti Kedes, ket adda idi kappia iti nagbaetan da Heber ken dagiti manangirurumen a Canaanita. (Uk 4:10, 11, 17, 21; kitaenyo ti KEDES Num. 3.) Kalpasan ti pannakaabak ni Sisera iti ima ti Israel, isu nagkamang iti awan dasdasiganna a pakarso ni Heber, a sadiay nga inawis ni Jael iti toldana. Kalpasanna, inabbonganna iti ules. Idi nagkiddaw iti inumenna a danum, inikkan ni Jael iti napagbalay a gatas a naikabil iti malukong ti bangkete. Kalpasan nga inabbonganna manen, kiniddaw ni Sisera nga agtakder ni Jael iti pagserkan ti tolda ket agbantay. Gapu ta impagarupna a natalgeden kas sangaili ni Jael, ti nabannog ken napakil a ni Sisera dagus a naalana ti nargaan a turogna. Idin ni Jael, kas maysa nga agtataeng iti tolda nga awan duadua a nairuam nga agipalok kadagiti pasok ti tolda, nagar-arudok a napan kenkuana nga addaan armas a martilio ken pasok ti tolda. Impalokna ti pasok iti ulo ni Sisera ket impalekna dayta iti daga. Idi dimteng ti kumamkamat a ni Barak, impakita ni Jael ti bangkay ti panguluen ti buyot, a natay “iti ima ti maysa a babai,” kas impakpakauna ni Debora. (Uk 4:9, 17-22) Ti natured a tignay ni Jael maibusor iti kalaban ni Jehova ket naitampok iti kanta ti panagballigi a pinutar da Debora ken Barak, a mangdakdakamat met ken Jael kas “kabebendituan kadagiti babbai.”​—Uk 5:6, 24-27.