JAHAZIEL

[Kitaen Koma ti Dios; Nakita ti Dios].

1. Maikatlo a nailista nga anak ni Hebron, maysa a Cohatita iti tribu ni Levi.​—1Cr 23:6, 12, 19; 24:23.

2. Maysa kadagiti nabileg a lallaki a kimmappon ken David idiay Siclag.​—1Cr 12:1, 4.

3. Maysa kadagiti addaan trumpeta a papadi a naisaad iti sanguanan ti lakasa ti tulag kalpasan nga impaiyeg dayta ni David iti Jerusalem.​—1Cr 16:1, 6.

4. Ti Levita nga impaayan ti espiritu ni Jehova iti bileg a mangisawang iti pammaregta ken Ari Jehosafat ken iti kongregasion idi impangta ida ti nabilbileg a puersa ti kabusor. Imbaga ni Jahaziel: “Kastoy ti kinuna kadakayo ni Jehova, ‘Dikay agbuteng wenno agkullayaw gapu iti daytoy dakkel a bunggoy; ta ti bakal saanyo a kukua, no di ket kukua ti Dios. . . . Saanyonto a kasapulan ti makirupak iti daytoy a kasasaad. Agsaadkayo, agtakderkayo a siiintek ket kitaenyo ti panangisalakan ni Jehova maigapu kadakayo.’” (2Cr 20:14-17) Ni Jahaziel ket anak ni Zacarias, kaputotan ni Asaf a kameng ti pamilia ni Gersom (Gerson [Ge 46:11]) a nagtaud ken Levi, ngarud saan a padi.​—1Cr 6:39-43.

5. Ti ama ni Secanias a maysa kadagiti nagsubli idiay Jerusalem a kadua ni Esdras idi 468 K.K.P.​—Esd 8:1, 5.