JARMUT

[nagtaud iti sao a kaipapananna ti “maipangato (maitan-ok)”].

1. Maysa kadagiti lima a siudad dagiti Amoreo a nakiraman iti gandat a panangraut tapno dusaenda dagiti Gabaonita. Pinarmek ni Josue ti ari dayta a siudad a ni Piram kasta met dagiti kaaliadona. Kalpasanna, daytoy a siudad nga adda iti Sefela ket naituding iti Juda. (Jos 10:3-5, 23-25; 12:7, 11; 15:20, 33, 35) Idi nagngudon ti pannakaidestiero idiay Babilonia, ti Jarmut ket nagnaedan manen dagiti Judeano. (Ne 11:25, 29) Ti kadaanan a disso nga ayanna ket kasla isu ti Khirbet Yarmuk (Tel Yarmut), agarup 26 km (16 mi) iti laud nga abagatan-a-laud ti Jerusalem. Adda dayta iti tuktok ti turod, matannawaganna dagiti tanap iti igid ti Baybay Mediteraneo agingga iti Gaza.

2. Maysa a siudad iti Isacar a naituding kadagiti Gersonita. (Jos 21:27-29) Naikuna nga isu met laeng ti Ramot (1Cr 6:73) ken Remet.​—Jos 19:21; kitaenyo ti RAMOT Num. 1.