JAZER

[[Ti Dios] Tumulong Koma].

Maysa a siudad dagiti Amoreo nga addaan sakup nga il-ili, masarakan iti daya ti Jordan. Idi tiempo ni Moises, dagiti Israelita inagawda ti Jazer ken ti rehion iti aglikmutna. (Nu 21:25, 32) Idi damo, naituding ti Jazer iti tribu ni Gad ken isuda ti nangsarikedked iti dayta, ngem idi agangay naituding daytoy kadagiti Levita. (Nu 32:1, 3-5, 34, 35; Jos 13:24, 25; 21:34, 38, 39; 1Cr 6:77, 81) Maysa dayta kadagiti lugar a nadakamat mainaig iti ruta a sinurot ni Joab ken ti papanguluen dagiti puersa militar idi insayangkatda ti imbilin ni David a panagsensus a saan nga inautorisaran ti Dios. (2Sm 24:4, 5) Iti arinunos ti panagturay ni David, ti sumagmamano a nabileg a lallaki a Hebronita nga agnanaed idiay Jazer ket naituding kas mamangulo iti teritoria ti Israel iti daya ti Jordan.​—1Cr 26:31, 32.

Idi maikawalo a siglo K.K.P., dagiti Moabita ti nangituray iti Jazer. Agparang a nalatak idin ti rehion, no saan a nasapsapa pay, gapu iti panagpatanorna iti ubas. Naipadto a ti Jazer ken ti dadduma pay a siudad iti Moab agsagabada iti masanguanan a didigra.​—Isa 16:8-10; Jer 48:32, 33.

Nupay adda nadumaduma a lugar a naisingasing kas kadaanan a Jazer, kaskasdi a saan a masinunuo ti eksakto nga ayanna.