JERAMEELITA, DAGITI

[Ken (Kukua ni) Jerameel].

Kapkaputotan ni Juda babaen ken Jerameel nga anak ni Hezron. (1Cr 2:4, 9, 25-27, 33, 42) Nagnaed dagiti Jerameelita idiay makin-abagatan a paset ti Juda, nalabit iti isu met laeng a rehion nga ayan dagiti Amalekita, Gesurita, ken Girzeo a rinubbuot ni David bayat a nakipagnanaed kadagiti Filisteo kas maysa a pugante manipud ken Ari Saul. No agsubli idi ni David manipud kadagita a panangrubbuot, impadpadamagna a dagitoy a panangrubbuot ket naaramid “iti abagatan ti Juda ken iti abagatan dagiti Jerameelita ken iti abagatan dagiti Keneo,” ngem pangtikaw laeng dayta. Ngarud, ti Filisteo a ni Ari Aquis impagarupna a rinubbuot ni David dagiti Israelita, iti kasta pinagbalinna ti bagina a buyok kadagiti kailianna, ket pinasayaatna ti pategna ken Aquis. (1Sm 27:7-12) Iti kinapudnona, dagiti lallakay “kadagiti siudad dagiti Jerameelita” imbingayan ni David idi agangay kadagiti samsam iti gubat.​—1Sm 30:26, 29.