JERUBAAL

[Bay-an ni Baal a Mangaramid iti Legal a Panangikalintegan (Makisupiat)].

Ti nagan a nayawag ken Gideon nga anak ni Joas nga Abi-ezerita kalpasan ti panangrebbana iti altar ni Baal a kukua ni amana ken ti sagrado a teddek a kayo nga adda iti sibay dayta. Kalpasanna, iti altar a naibangon ken Jehova, nangisakripisio ni Gideon iti toro a kukua ni amana, ket inusarna dagiti pedaso ti kayo ti sagrado a teddek kas sungrod.​—Uk 6:11, 25-27.

Iti agsapa ti simmaganad a bigat, idi natakuatanda ti napasamak, kasta unay ti pungtot dagiti lallaki ti Ofra. Gapuna nagimtuodda, ket idi naduktalanda a ni Gideon ti nangaramid iti daytoy a banag, indawatda a mapapatay. Ngem dimmasig kenkuana ti amana a ni Joas, a nagkuna: “Dakayto kadi ti mangaramid iti legal a panangikalintegan ken Baal tapno kitaenyo no dakayo maisalakanyo? Siasinoman a mangaramid iti legal a panangikalintegan kenkuana rebbeng a mapapatay iti daytoy met laeng a bigat. No isu Dios, bay-anyo a mangaramid iti legal a panangikalintegan iti bagina, agsipud ta adda nangrugpo iti altarna.” Itultuloy nga isalaysay ti Biblia: “Ket rinugianna nga awagan iti Jerubaal iti dayta nga aldaw, a kunkunana: ‘Bay-anyo ni Baal a mangaramid iti legal a panangikalintegan maigapu kenkuana met laeng, agsipud ta adda nangrugpo iti altarna.’”​—Uk 6:28-32.

Naawagan ni Gideon iti Jerubbeset idiay 2 Samuel 11:21.​—Kitaenyo ti GIDEON.