JOA

[Ni Jehova ket Kabsat (Kadua)].

1. Maysa kadagiti Levita a naituding nga agaywan iti ruangan idi kaaldawan ni David tapno agbantay kadagiti kamalig; ti maikatlo nga anak ni Obed-edom.​—1Cr 26:1, 4, 12-15.

2. Maysa a Levita a nagtaud ken Gersom (Gerson); anak ni Zimma. (1Cr 6:1, 19b-21) Mabalin nga isu met laeng ti Joa. Isu ken ti anakna timmulongda a mangibelleng iti narugit a bambanag nga inikkat ni Ezekias manipud iti templo idi rugrugi ti panagturayna.​—2Cr 29:1, 3, 12, 16.

3. Maysa kadagiti tallo nga imbaon ni Ari Ezekias a dumngeg iti ibaga ni Rabsaque a mensahero ti Asiria nupay saanda a sumungbat kadagiti pammabasol ken panagpangasna. Nupay kasta, ni Joa ken ti dua a kakaduana indawatda nga agsao kadakuada ni Rabsaque iti pagsasao ti Siria (a maawatanda a mismo) imbes nga iti pagsasao dagiti Judio ta dumdumngeg dagiti dadduma iti pader ti siudad. Immayda ken Ezekias a naray-ab dagiti kawesda ket impadamagda dagiti pangta ni Rabsaque. (2Ar 18:18, 26, 36, 37; Isa 36:3, 11, 21, 22) Ti sasao a “ni Joa nga anak ni Asaf nga agilislista” posible a kaipapananna a ni Joa wenno ni Asaf ti “agilislista,” ngem mabalbalin a ni Joa a mismo ti makin-akem iti daytoy, no kasano a nadeskribir met ti akem dagiti dua a kakaduana.

4. Ti nagserbi kas agilislista idi tiempo ni Ari Josias. Isu ti nangawit iti kuarta nga impatulod ti ari agpaay kadagiti trabahador a mangtarimaan iti templo. Anak ni Joacaz.​—2Cr 34:8-11.