HUDISIAL A PANGNGEDDENG
Panangukom nga inyetnag daydiay wenno dagidiay adda iti autoridad. (2Sm 8:15; 1Ar 3:16-28; 10:9; 2Ar 25:6; 2Cr 19:8-10) Ni Jehova a Dios, kas Ukom, Manangted-Paglintegan, ken Ari (Isa 33:22), impaayanna ti nasion ti Israel iti nalawa ti saklawna a kodigo dagiti linteg. Dagiti pangngeddengna iti bambanag mainaig iti linteg nangipaay kadagiti pagalagadan iti panangikeddeng iti bambanag a nakairamanan dagiti indibidual ken ti makin-uneg ken makinruar nga ar-aramid ti nasion.—Kitaenyo ti LEGAL A KASO; LINTEG; PANGUKOMAN.
Adu kadagitoy a hudisial a pangngeddeng ket naited iti nasion ti Israel idiay Bantay Sinai. (Ne 9:13) Ngem no dadduma adda dagiti kasasaad a nagkasapulan iti naisangayan a hudisial a pangngeddeng. Kas pagarigan, idi a ti Manasesita a ni Zelofehad nakaibati laeng iti annak a babbai, timmaud ti saludsod no rumbeng nga umawatda iti tawid. Idin nangipaay ni Jehova iti pangngeddeng a nangsaklaw iti dayta kaso ket idi agangay nagserbi kas paglintegan iti panangtaming kadagiti umarngi a kasasaad. (Nu 27:1-11; 36:1-12; kitaenyo met ti Le 24:10-16.) Umasping iti dayta, ti hudisial a pangngeddeng nga inaramid ni David maipapan iti pannakaibunong dagiti samsam iti gubat nangipasdek iti legal a pagtuladan.—1Sm 30:23-25.
Babaen ti panangitudingna iti sumagmamano a gagangay ngem makadangran unay nga ar-aramid kas kadagsenan a basbasol, ti nadibinuan ti pannakaipaayna a hudisial a pangpangngeddeng naglatak kas naisalsalumina kadagiti linteg ti kapanawenan a nasnasion. Ti il-ili iti aglikmut nagar-aramidda iti bestialidad, sodomia, insesto, ken dadduma pay a nakababain nga ar-aramid a makadangran iti mental, pisikal, ken iti naespirituan a kasasaad. (Le 18:6-30; 20:10-23) Gapuna, ti hudisial a pangpangngeddeng ni Jehova, no napagtulnogan, intan-okna koma ti nasion ti Israel. Buyogen ti pamendision ni Jehova, ti nainget a panangannurot ti Israel kadagiti bilinna nangibunga koma kadagiti nabatad a pagimbagan, a pakaigapuan ti panangikuna ti sabsabali a nasion: “Daytoy dakkel a nasion di pagduaduaan a masirib ken mannakaawat nga ili.” (De 4:4-6) Yantangay pudno a bendision dagitoy iti Israel (Le 25:18, 19; De 4:1; 7:12-15; 30:16), saan a pakasdaawan nga inkararag ti salmista nga isu masursuruan koma kadagiti hudisial a pangngeddeng ni Jehova. (Sal 119:108) Tinagipategna unay dagita ta indaydayawna ni Jehova iti pito a daras iti maysa nga aldaw gapu kadagiti hudisial a pangngeddengna (Sal 119:164), a bimmangon pay iti tengnga ti rabii tapno agyaman iti Dios maigapu kadagita.—Sal 119:62.
Nupay kasta, numan pay naimbag, nalinteg, ken nasantuan, nagserbi laeng dagiti hudisial a pangngeddeng ti Linteg kas manangisuro a mangiturong ken Kristo. Dayta a Linteg ti tulag sinukatan ti baro a tulag. (Ro 7:12; Ga 3:24; Heb 8:7-13) Isu a mainanama a ti panagtulnog kadagiti bilin, wenno hudisial a pangngeddeng, a nainaig iti baro a tulag mangibunga iti adayo a nangayngayed a bembendision ngem kadagidiay napasaran ti nainkasigudan nga Israel iti sidong ti Linteg.—Jn 13:34, 35; 1Co 6:9-11; 1Pe 1:14, 15, 22, 23; 2:9, 10; 1Jn 5:3.