KIR

Ti lugar a naggapuan dagiti Aramaeano idi napanda idiay Siria, nupay saanna a kayat a sawen a dayta ti sigud a taengda. (Am 9:7) Babaen ken mammadtona nga Amos (1:5), impasimudaag ni Jehova a dagiti Aramaeano agsublida iti Kir, ngem kas destiero. Natungpal daytoy a padto idi a ni Tiglat-pileser III, kalpasan a pinasuksokan ni Ari Acaz ti Juda nga aramidenna ti kasta, kinautibona ti Damasco, ti Aramaeano a kabesera, ket indestierona idiay Kir dagiti agnanaed iti dayta.​—2Ar 16:7-9.

Iti Isaias 22:5, 6, nailadawan ti Kir kas agsagsagana a bumusor iti “ginget ti sirmata” (naipagarup a mangiladawan iti Jerusalem). Ti kaaduan tarusanda a daytoy a padto natungpal idi tiempo ti kampania ti Asirio nga Ari Senaquerib maibusor iti Juda. Agsipud ta ti Kir nainaig iti Elam iti daytoy a teksto, adda dagiti nangisingasing a masarakan la ketdi dayta iti isu met laeng a lugar a kas ti Elam, iti daya ti Karayan Tigris. (Idiligyo ti Isa 21:2, a sadiay ti Media a pagaammo a kabangibang ti Elam no geograpia ti pagsasaritaan ket naikadua iti Elam iti umasping a pamay-an.) Iti Griego a Septuagint, saan a nausar ti “Kir” iti aniaman kadagiti nadakamaten a teksto no di ket naaramat ti adu a nadumaduma a sasao maipaay iti Hebreo a qir. Gapuna, agtalinaed a saan a masigurado ti aktual nga ayanna.