BARANDILIAS

Balabala a buklen dagiti nagbibinnallangan a nagislagisla a kayo, wenno liston, a nalagalaga ken gagangay a naaramat a pangtakkab iti maysa a tawa. Iti sinigsiglo, dagiti barandilias ti tawa ket kadawyan idiay Makintengnga a Daya. Nagpaay dagitoy a mamagtalinaed a nalamiis ti balbalay babaen ti panangsarapada kadagiti direkta a sinamar ti init, bayat a makastrek latta ti angin, ket nakaipaayda pay iti kanayonan a pangpapintas iti pakabuklan a langa dagiti patakder. Ti makimbaba a kadsaaran ti sumagmamano a balay kadagidi tiempo ti Biblia addaanda iti tawtawa a sisasango iti makin-uneg a paraangan ket ti dadduma sisasango iti kalsada. Ti naud-udi a nadakamat a tawtawa gagangay a nangato ti ayanda iti diding wenno iti siled iti pangatepan ken nabarandiliasanda.

Ti maysa a tao iti balay mabalinna ti tuman-aw iti nabarandiliasan a tawa ket kitaenna no ania ti mapaspasamak iti ruar nga isu di makita manipud iti ruar. Iti kanta da Debora ken Barak, ti ina ti napapatay a ni Sisera nailadawan kas barengbareng a tumantan-aw manipud maysa a tawa ken mangpadpadaan iti anakna “manipud barandilias.” (Uk 5:1, 28) Manipud iti tawa iti babaet ti maysa a barandilias, ti maysa nga agpalpaliiw mabalin a matannawaganna ti “maysa nga agtutubo a lalaki nga awanan puso” bayat a makisasao iti maysa a balangkantis. (Pr 7:6-13) Kasta met, iti Kanta ni Solomon (2:9), natukoy ti “tumantan-aw kadagiti tawa, tumaltaldiap iti babaet dagiti barandilias.”

Nabatad a ti sumagmamano a barandilias ti tawa ket naikapet babaen iti bisagra tapno mabalin ida nga ilukat wenno irikep. Dagiti tawa iti siled ni Daniel iti pangatepan, nga iti dayta isu makita nga agkarkararag ken Jehova iti tallo a daras iti inaldaw, mabalin nga addaan kadagiti barandilias a mailukat wenno mairikep.​—Da 6:10.