LEHI

[Tulang ti Panga].

Ti nakaaramidan ti maysa wenno mabalin a dua a panagballigi dagiti Israelita maibusor kadagiti Filisteo. Saan nga ammo ita ti eksakto nga ayanna. Adda dagiti mangibaga a dayta ita ti Khirbet es-Suyag, a ti naganna nalabit naadaw iti Griego a sao a si·a·gonʹ (tulang ti panga), nakurang a 3 km (2 mi) iti daya ti Bet-semes.

Idiay Lehi, kinabil ni Samson ti sangaribu a Filisteo babaen iti sadiwa a tulang ti panga ti maysa nga asno. Kalpasanna, inawaganna dayta a disso iti Ramat-lehi (kaipapananna ti “Nangato a Disso ti Tulang ti Panga”), nalabit kas panglaglagip iti balligi nga inted kenkuana sadiay ni Jehova. (Uk 15:9-19) Nupay kasta, mabalin nga idi damo, ti Lehi naalana ti naganna manipud iti sukog dagiti napasdok a batona.

Idi agangay, sigun iti patarus ti adu a managipatarus, kinabil ni Sammah ti adu a Filisteo a naguummong idiay Lehi. (2Sm 23:11, 12; AT, JB, NW, RS) Nupay kasta, “iti purok a tolda” ti literal a kaipapanan ti Hebreo a termino a la·chai·yahʹ, ket babaen iti sangkabassit a panangbalbaliw iti marka ti bokales, naipatarus dayta kas “iti Lehi.”