LICAONIA

Maysa a rehion iti Asia Menor a ti maar-aramat a pagsasao ket Licaonia (wenno Licaoniano). (Ara 14:6-11) Dagiti beddeng ti Licaonia ket nagbaliwbaliw bayat ti intero a pakasaritaanna isu a saan a masigurado no sadino. Idi tiempo a nadakamat ti Licaonia iti rekord ti Biblia, kangrunaanna nga adda dayta iti makin-abagatan a paset ti Galacia a probinsia ti Roma ket kabeddengna ti Pisidia ken Frigia iti laud, Capadocia iti daya, ken Cilicia iti abagatan. Daytoy a lugar buklen ti maysa a tanap nga awanan kaykayo ken limitado ti danumna. Nupay kasta, idi un-unana nabunga daytoy a lugar ken umanay a pagpaaraban iti nakaad-adu a karnero.

Sinarungkaran ni apostol Pablo ti Derbe ken Listra, dua a siudad ti Licaonia, bayat ti umuna ken maikadua a panagdaliasatna kas misionero. Mabalin a dimmagas met sadiay iti maikatlo a panagdaliasatna kas misionero bayat ti ipapanna iti “linuganlugar iti pagilian ti Galacia.”​—Ara 14:6, 20, 21; 16:1; 18:23.