MARA
[Napait, Kinapait].
1. Ti nagan nga insingasing ni Noemi a mayawag kenkuana idi inyebkasna ti napait a riknana wenno napalaus a ladingitna gapu iti ipapatay ti asawana a ni Elimelec ken ti annakna a da Malon ken Kilion. Pimmanaw ni Noemi manipud Betlehem a kadua ti asawana ken ti dua nga annakna (Ru 1:1, 2), ngem sililiday a nagsubli manipud Moab a balo ken awananen iti annak. Iti dayta a tiempo inyimtuod dagiti dati a gagayyemna, dagiti babbai ti Betlehem: “Isu kadi daytoy ni Noemi?” Gapu ta naladingit pay laeng, insungbatna: “Saandak nga awagan iti Noemi [kaipapananna “Ti Kinamakaay-ayok”]. Awagandak iti Mara [kaipapananna ti “Napait”], ta ti Mannakabalin-amin pinagbalinna a napait unay kaniak. Napanak idi a sipupunno, ket ima-ima a pinagsublinak ni Jehova.”—Ru 1:19-21.
2. Maysa kadagiti immun-una a nagkampuan ti Israel idiay Peninsula ti Sinai. Napanaganan iti “Mara” gapu iti makasugkar a danum a nasarakan sadiay. (Ex 15:23; Nu 33:8) Nupay nabiit pay a naispal dagiti Israelita manipud ima dagiti Egipcio idiay Nalabaga a Baybay, awanan pammati a nagtantanabutobda gapu ta saanda a mabalin nga inumen ti danum idiay Mara. Gapuna, imbilin ni Jehova a mangipuruak ni Moises iti maysa a kayo iti danum, ket simmam-it ti danum wenno simmayaat ti ramanna. Saan nga espesipiko a dakamaten ti Biblia no ania dayta a kayo, isu nga imposible a masinunuo dayta. Siempre, mabalin koma ni Jehova nga iturong ni Moises iti maysa a kita ti kayo nga addaan kadagiti natural a sangkap a ‘mangpasam-it’ iti danum. Ngem saantayon a kasapulan ti sientipiko wenno natural a panangilawlawag, yantangay nabatad a simimilagro a napaimbag ti danum.—Ex 15:23-25; idiligyo ti 2Ar 2:19-22; 4:38-41.
Inusar ni Jehova dagiti kasasaad idiay Mara kas pannubok iti kinabileg ti pammati dagiti Israelita iti pannakabaelna a mangaywan kadakuada. Yantangay makaited ti sakit ti pananginum iti di nasayaat a danum (2Ar 2:19), ti ‘pannakapasam-it’ ti danum imparangarangna ti pannakabael ni Jehova a mangsaluad kadagiti Israelita manipud saksakit a napasaran dagiti Egipcio. Daytoy ti “pagalagadan” nga insuro idi ni Jehova kadagiti Israelita: Ti panagtulnog kenkuana kas Diosda iliklikna ida iti panagsagaba iti saksakit nga impalak-amna kadagiti Egipcio.—Ex 15:25, 26.
Kadawyan a maikunkuna ti Mara isu ti ʽEin Hawwara, 80 km (50 mi) iti abagatan nga abagatan-a-daya ti agdama a Suez, sumagmamano laeng a milia manipud Nalabaga a Baybay.