PLASA

Nalayang a lugar a nagpaay kas sentro a paggatangan ken paglakuan ken kas paguummongan ti publiko kadagiti siudad ken ili ti kadaanan a Makintengnga a Daya ken idi panawen ti Imperio ti Roma. Kadagiti Griego ken Romano a siudad, nalikmut ti nalayang a lugar babaen kadagiti estatua ken publiko a patpatakder, agraman dagiti narelihiosuan a patakder. Agparang a ti sumagmamano a hudisial a banag ket nataming kadagiti plasa. (Idiligyo ti Ara 16:19-21.) Kasta met a maammuan iti plasa ti nadumaduma a damag (lokal ken manipud sabali a daga), ta sadiay a nagtataripnong ti tattao ken nagsasaritaanda ti kaudian a paspasamak.​—Idiligyo ti Ara 17:17-21.

Kadagiti plasa ti Palestina, adda dagiti ubbing nga agaayam. (Mt 11:16; Lu 7:32) Mabalin a sitatakder sadiay dagiti lallaki nga awanan iti pagsapulan kasta met dagidiay mayat a matangdanan iti maysa nga aldaw. (Idiligyo ti Mt 20:3, 4.) Dagiti napannakkel nga eskriba ken Fariseo kayatda a makita ida sadiay dagiti reprep a tattao ken kayatda ti makablaawan iti ak-akuenda a nangato a saadda. (Mt 23:2, 6, 7; Mr 12:38; Lu 11:43; 20:46) No dagiti mangsalsalimetmet iti tradision a Fariseo ken ti dadduma pay a Judio aggapuda iti plasa wenno tiendaan, warsianda ti bagbagida tapno agbalinda a nadalus sakbay a manganda iti aniaman a taraon.​—Mr 7:3, 4.

Bayat nga adda ni Kristo Jesus ditoy daga, adda dagiti tattao a pinaimbagna kadagiti plasa. (Mr 6:56) Ket inaldaw a nakirinnason ni apostol Pablo “idiay plasa [ti Atenas] kadagidiay nairanrana nga adda.”​—Ara 17:16, 17; kitaenyo ti APPIO, PLASA NI.