MATIAS

[nalabit a napaababa a porma ti Heb. a Matitias, kaipapananna ti “Sagut ni Jehova”].

Ti adalan a napili babaen ti binnunot tapno agbalin nga apostol a kasukat ni Judas Iscariote. Impadto ni salmista David ti isisiasi ni Judas (Sal 41:9) ken insurat met ni David (Sal 109:8) a “ti akem [ni Judas] a panangaywan alaen koma ti sabali.” Kalpasan ti iyuuli ni Jesus idiay langit, yantangay ammo ni Pedro dagitoy a padto insingasingna iti agarup 120 nga adalan a naguummong a mapunnuan koma ti nabakantean nga akem. Da Jose Barsabas ken Matias ti naisingasing a pagpilian; kalpasan ti panagkararag, nagbibinnunotda, ket ni Matias ti napili. Napasamak daytoy sumagmamano laeng nga aldaw sakbay ti pannakaiparukpok ti nasantuan nga espiritu, ket daytoy ti kaudian a naipadamag iti Biblia a naaramat ti panagbibinnunot iti panangammo iti pili ni Jehova maipapan iti maysa a banag.​—Ara 1:15-26.

Sigun iti sasao ni Pedro (Ara 1:21, 22), ni Matias ket pasurot idin ni Kristo iti las-ud ti tallo ket kagudua a tawen a ministerio ni Jesus, ket nasingeden a katimtimpuyog dagiti apostol. Mabalin nga isu ket maysa kadagiti 70 nga adalan wenno ebanghelisador nga imbaon ni Jesus a mangasaba. (Lu 10:1) Kalpasan ti pannakapilina, imbilangen ti kongregasion kas karaman kadagiti sangapulo ket maysa nga apostol (Ara 1:26), ket dagus kalpasan dayta karamanen ni Matias no madakamat “dagiti apostol” wenno “dagiti sangapulo ket dua” iti libro nga Aramid.​—Ara 2:37, 43; 4:33, 36; 5:12, 29; 6:2, 6; 8:1, 14; kitaenyo ti PABLO.