KINANATAENGAN
Ti kasasaad a nataengan, natangkenan, naan-anay, a maibatay iti maysa a pagalagadan. (Kitaenyo ti KINANAAN-ANAY, KINAPERPEKTO.) Ipaay ti Biblia ti pagalagadan iti panangikeddeng no ania ti naespirituan a kinanataengan (kinanaan-anay). Sigun iti daytoy a pagalagadan, ti nataengan a Kristiano ket saan a naespirituan a maladaga, a masansan nga agbaliwbaliw ken nalaka nga iyaw-awan wenno impluensiaan ti sabsabali no maipapan iti doktrina. (Efe 4:11-14) Yantangay nasanay ti pannakaawatna, kabaelanna a lasinen agpadpada ti umiso ken ti di umiso. Saanen a kasapulan a masursuruan kadagiti pamunganayan a banag. (Heb 5:11–6:2) Isu iwanwanwan ti espiritu ti Dios, saan a ti nailubongan a sirib.—1Co 2:6, 10-13, Rbi8 ftn.
Pulos nga awan dakamaten ti Biblia a rukod wenno tukad ti naespirituan a kinanataengan wenno kinaadulto. Nupay kasta, no kasano a ti maysa a tao agtultuloy a rumang-ay iti pannakaammo, kapadasan, ken pannakatarus kalpasan a nagbalin nga adulto, kasta met a ti nataengan a Kristiano agtultuloy a rumang-ay. Babaen kadagiti pakasuotan a napasaranna, mapabileg ti pammati ken panagibturna. Insurat ni adalan a Santiago: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur. Ngem bay-anyo a ti panagibtur an-anayenna ti aramidna, tapno maan-anay [iti literal, perpekto] ken nasalun-atkayo iti amin a bambanag, a saan nga agkurang iti aniaman.” (San 1:2-4) Umasping iti dayta, no kasano a dagiti adulto nagduduma dagiti pisikal nga aspetoda ken dagiti mental nga abilidad ken sagudayda, kasta met a dagiti nataengan a Kristiano mabalin a nagduduma ti piho a kualidadda, a ti dadduma mailasin babaen iti maysa nga aspeto, kas iti pannakaammo, panangikeddeng, kinatured, wenno kinamanagparabur; ket ti dadduma addaan met iti sabali a kualidad. (Idiligyo ti 1Co 7:7; 12:4-11, 27-31.) Gapuna, no usigen ti kinanataengan, nasken nga ikabilangan a dagiti naisangsangayan nga abilidad wenno saguday saan nga isu ti bambanag a mangikeddeng no ti maysa ket nataengan a Kristiano wenno saan.
Ti intero nga urnos ti kongregasion, karaman dagiti apostol, mammadto, managebanghelio, papastor, ken mannursuro, ket nagserbi a mangpataud kadagiti nataengan a Kristiano, dagiti naespirituan nga adulto. (Efe 4:11-14; idiligyo ti Col 1:28, 29; 4:12, 13.) Nabatad ngarud a dagidiay agserserbi kas papastor ken mannursuro ket kasapulan a nataengan, saan nga ubbing, iti naespirituan. Nupay kasta, ad-adda pay ngem iti naespirituan a kinaadulto ti makalikaguman iti maysa a nadutokan a manangaywan wenno ministerial nga adipen. (1Ti 3:1-9, 12, 13; Tit 1:5-9) Kas pagarigan, ti maysa kadagiti makalikaguman iti manangaywan ket “maysa a lalaki a mangidadaulo iti bukodna a sangakabbalayan iti nasayaat a pamay-an, addaan iti annak nga agpaspasakup buyogen ti isuamin a kinaserioso.” (1Ti 3:4) Gapuna, mabalin a ti maysa a lalaki ket nataengan iti sumagmamano nga aspeto manipud naespirituan a panangmatmat, ngem no dagiti annakna ket rebelioso ken di paiturturong, saan a kualipikado nga agserbi kas manangaywan.