MENSAHERO
Daydiay agaw-awit iti mensahe, mabalin a berbal wenno naisurat, wenno daydiay adda banag a nakaibaonanna. (Ge 32:3-6; Uk 6:34, 35; 11:12-27; 2Sm 5:11; 1Ar 19:2; 2Ar 19:8-14; Lu 7:18-24; 9:52) No dadduma, daytoy ti annongen dagiti tumataray. (2Cr 30:6-10; Jer 51:31) Tapno naparpartak ti komunikasion, naibaon dagiti nakakabalio a mensahero. (2Ar 9:17-19; Est 8:10-14; kitaenyo ti AGITULTULOD.) Dagiti mensahero idi un-unana ramanenna dagiti manangiwaragawag a nangipakaammo iti publiko maipapan kadagiti pammilin ti ari wenno iti bilbilin nga agpaay iti estado. (Da 3:4-6; 5:29) Mabalin a naibaon dagiti mensahero tapno agkiddawda iti kappia (Isa 33:7), namilitariaan a tulong (2Ar 16:7; 17:4), wenno tapno agdawatda iti impuesto wenno ikalikagumda ti isusuko ti maysa a siudad (1Ar 20:1-9; 2Ar 18:17-35). Naipaayanda iti wayawaya a lumasat tapno maibanagda ti misionda. Ti panangranggas kadagiti mensahero nga imbaon ti ari maipaay iti nadayaw nga isasarungkar iti sabali a nasion ket umanayen a mangpasged iti gubat.—2Sm 10:1-7; kitaenyo ti EMBAHADOR.
Agpadpada a ti Hebreo ken ti Griego a sasao maipaay iti “mensahero” ket mabalin a tumukoy kadagiti espiritu a mensahero, wenno anghel. (Sal 104:4; Jn 1:51) Masinunuo babaen iti konteksto no ti matuktukoy ket dagiti mensahero a tao wenno dagiti anghel. Kas pagarigan iti Isaias 63:9, ti ‘kabukbukodan a mensahero’ ni Jehova nabatad nga isu ti anghelna, ta daytoy a mensahero insalakanna dagiti Israelita.—Idiligyo ti Ex 14:19, 20.
Malaksid iti panagaramat ni Jehova kadagiti mensahero nga anghel a mangidanon iti mensahe kadagiti lallaki ken babbai ditoy daga ken mangitungpal iti dadduma pay nga annongen (kitaenyo ti ANGHEL), maulit-ulit met nga inaramatna dagiti mensahero a tao. Dagiti mammadtona ken papadina isuda ti nagserbi a mensaherona iti nasion ti Israel. (2Cr 36:15, 16; Hag 1:13; Mal 2:7) Sigurado a matungpal ti sasao dagiti mammadtona, ta ni Jehova “Daydiay mangitungpal a naan-anay iti pammatigmaan dagiti bukodna a mensahero.”—Isa 44:26.
“Mensahero ti Tulag.” Kas kaitungpalan ti Malakias 3:1, nagparang ni Juan a Manangbautisar kas mensahero a nangisagana iti dalan iti sanguanan ni Jehova babaen ti panangisaganana kadagiti Judio maipaay iti iyaay ti kangrunaan a pannakabagi ti Dios, ni Jesu-Kristo.—Mt 11:10, 11; Mr 1:1-4; Lu 7:27, 28.
Kas ti naipadto a “mensahero ti tulag,” immay ni Jesu-Kristo iti templo ket dinalusanna dayta. (Mt 21:12, 13; Mr 11:15-17; Lu 19:45, 46) Nabatad nga isu ti mensahero ti Abrahamiko a tulag, ta maibatay iti daytoy a tulag naipaayan dagiti Judio iti kaunaan a pribilehio nga agbalin nga agtawid iti Pagarian. Daytoy a tulag ti indatag ni Pedro idi indawatna kadagiti Judio nga agbabawida. Makapainteres met a maammuan a ti ama ni Juan a Manangbautisar, ni Zacarias, tinukoyna ti Abrahamiko a tulag mainaig iti panangpatanor ni Jehova iti ‘sara ti pannakaisalakan iti balay ni David,’ a daytoy a sara isu ti Mesias.—Idiligyo ti Mt 10:5-7; 15:24; 21:31; Lu 1:69-75; Ara 3:12, 19-26.