MINISTERIO
Ti trabaho ken panagserbi nga aramiden ti maysa a ministro, adipen, wenno katulongan a manungsungbat iti sanguanan ti maysa a natantan-ok nga autoridad. Iti kadaanan nga Israel, nagserbi dagiti Levita kas ministro ni Jehova. Naaramat met dagiti mammadto maipaay iti naisangsangayan a panagserbi. (De 10:8; 21:5; kitaenyo ti LEVITA; MINISTRO; PADI.) Nupay kasta, nangrugi ti maysa a baro a ministerio idi immay ni Jesu-Kristo ditoy daga. Binilinna dagiti pasurotna a mangaramidda iti ad-adalan kadagiti tattao iti amin a nasion. (Mt 28:19, 20) Gapuna, addaan dagiti Kristiano iti mensahe mainaig iti pannakikappia iti Dios baeten ken Kristo iti lubong a naisina iti Dios.—2Co 5:18-20.
Dagidiay nangipangag iti “ministerio ti pannakikappia” (2Co 5:18) ket kasapulan a masanay, masursuruan, matulongan, ken maiwanwan iti umiso a pamay-an tapno agbalin ken agtalinaed a natibker ti pammatida, kasta met a tapno maitungpalda a mismo ti trabaho a panagaramid iti adalan. (Idiligyo ti 2Ti 4:1, 2; Tit 1:13, 14; 2:1; 3:8.) Gapuna, kalpasan ti iyuuli ni Kristo Jesus sadi langit, kas ulo ti kongregasion, nangted kadagiti “sagut a tattao”—dagiti apostol, mammadto, ebanghelisador, pastor, ken mannursuro—“iti panggep a panangatur kadagiti sasanto, maipaay iti trabaho a panagministerio, maipaay iti pannakapabileg ti bagi ti Kristo.”—Efe 4:7-16; kitaenyo ti SAGSAGUT MANIPUD ITI DIOS.
Ti sabali pay nga aspeto ti ministerio iti uneg ti kongregasion ket maipapan iti panangasikaso kadagiti material a kasapulan dagidiay marigrigat a kakabsat a maikari a tulongan. Ti ministerio a nakadutokan ni Esteban ken ti innem a sabsabali pay a kualipikado a lallaki ramanenna ti panagiwaras iti abasto a taraon kadagiti Kristiano a balo a babbai. (Ara 6:1-6) Idi agangay, dagiti kongregasion idiay Macedonia ken Acaya nakiramanda iti maysa a ministerio a panangtulong iti napapanglaw a kakabsat idiay Judea. (2Co 8:1-4; 9:1, 2, 11-13) Idi naummongen ti kontribusion ket agsagsaganan ni Pablo a mangipan iti dayta idiay Jerusalem, indawatna kadagiti kakabsat idiay Roma nga agkararagda a bumuyog kenkuana tapno agballigi daytoy a ministerio a panangtulong kadagiti sasanto a nakairantaan dayta.—Ro 15:25, 26, 30, 31.
Sumagmamano a tawen sakbay daytoy, adda umasping a pannakaiparangarang ti ayat nga impakita dagiti Kristiano idiay Antioquia, iti Siria, bayat a nakipasetda iti tulong a pagserbi kadagiti kakabsat nga agnanaed idiay Judea kabayatan ti maysa a tiempo ti bisin.—Ara 11:28-30.