MITILENE

Ti kangrunaan a siudad ti Lesbos, maysa nga isla iti Baybay Aegeano nga asideg iti makinlaud a kosta ti Asia Menor. Bayat nga agturturong ni apostol Pablo idiay Jerusalem idi agarup 56 K.P., naglayag nga agturong idiay Mitilene manipud Assos, maysa a sangladan iti Asia Menor nga agarup 45 km (28 mi) iti amianan nga amianan-a-laud a direksion. (Ara 20:14) Yantangay saan a nadakamat a timmakdang ni Pablo, ipasimudaag ngarud daytoy a nagangkla laeng ti barko idiay Mitilene, nalabit gapu ta kimmapuy ti kasapulan nga angin nga aggapu iti amianan. Kabigatanna, nagtuloy ti barko iti abagatan nga abagatan-a-laud ket nagturong idiay Chios.​—Ara 20:15.

Naikuna a sigud a saklaw ti Mitilene ti maysa a bassit nga isla nga asideg iti makindaya a kosta ti Lesbos. Ngem bayat a dumakdakkel ti siudad, mabalin a naisilpo daytoy iti Lesbos babaen ti naigabur a dalan ken limmawa ti igidna. Daytoy ti rason a naaramid ti maysa a sangladan iti makin-amianan a deppaar ken maysa pay iti makin-abagatan a deppaar dayta a dalan. Nagdindinamag ti siudad kas maysa a pagadalan iti literatura ken gapu iti kinapintas ti arkitektura dagiti patakderna.