MIRRA

Nabanglo a napigket a tutot. (Sol 1:13; 4:6, 14; 5:1, 13) Idi un-unana, saan a masigurado ti apag-isu a gubuayan dayta. Ngem kaaduanna a ti mirra isu ti tutot a maala manipud nadumaduma a nasiit a nababa a kayo wenno babassit a kayo iti kakikita a Commiphora, a kas iti Commiphora myrrha wenno Commiphora abyssinica. Dagitoy a nababa a kayo agtubtuboda kadagiti nabato a lugar, nangnangruna kadagiti apug a bato a turod. Nakaro ti angot ti kayo ken ukisda. Nupay ti tutot tumbog a bukbukodna manipud iti ungkay wenno manipud iti napuskol ken nasikkil a sangsanga ti aniaman kadagita a dua a kakikita ti mirra, mapaadu ti panagtubbog babaen iti panangsugatsugat. Iti damo a panagruar ti tutot, nalukneng ken napigket dayta ngem tumangken apaman a dumanon ti tedtedna iti daga.

Ti mirra ket maysa kadagiti sangkap a naaramat iti panangaramid iti nasantuan a pangpulot a lana. (Ex 30:23-25) Maibilbilang a napateg gapu iti banglona, naus-usar dayta a pangpabanglo kadagiti kawes, pagiddaan, ken dadduma pay a banag. (Idiligyo ti Sal 45:8; Pr 7:17; Sol 3:6, 7.) Ti balasang a Sulamita iti Kanta ni Solomon agparang a sinapsapuanna ti bagina iti likido a mirra sakbay a maturog iti rabii. (Sol 5:2, 5) Ti pannakamasahe iti lana ti mirra ket nairaman iti naisangsangayan a pannakapapintas a naipaay ken Ester. (Est 2:12) Ti mirra ket maysa met kadagiti sangkap a naaramat iti panangisagana kadagiti bagi maipaay iti pannakaitabon. (Jn 19:39, 40) Mabalbalin a naibilang dayta kas umdas ti kinapategna a maidatag kas sagut iti daydiay nayanak nga ari dagiti Judio.​—Mt 2:1, 2, 11.