NABOT

Maysa a Jezraelita nga agtagtagikua iti maysa a kaubasan ken biktima ti nadangkes a plano ni Reyna Jezebel. Ti kaubasan ni Nabot idiay Jezrael ket makita manipud palasio ni Ari Acab. Kiniddaw ni Acab a gatangenna dayta a kaubasan wenno suktanna iti nasaysayaat a kaubasan iti sabali a lugar, ngem pinagkedkedan ni Nabot daytoy agsipud ta iparit ni Jehova a mailako iti agnanayon ti maysa a tawid ti pamilia. (1Ar 21:1-4; Le 25:23-28) Nupay kasta, ti asawa ni Acab a ni Reyna Jezebel immaniobrana nga adda dua a saksi a siuulbod a mangpabasol ken Nabot iti panangtabbaaw iti Dios ken iti ari. Kas nagbanaganna, napapatay ni Nabot ken ti annakna (2Ar 9:26), iti kasta tinagikua ni Acab dayta a kaubasan. Gapu iti daytoy a pammapatay, impadto ni Elias a dagiti aso saandanto laeng a lamuten ni Jezebel no di ket dildilanda pay ti dara ni Acab iti isu met laeng a disso a nangdildilanda iti dara ni Nabot. Magessatto met uray dagiti putot ni Acab. (1Ar 21:5-23) Idi agangay, naitungpal daytoy a panangukom ti Dios.​—1Ar 22:34, 38; 2Ar 9:21, 24-26, 35, 36; 10:1-11.