NATAN

[Nangted [ti Dios]].

1. Maysa a kaputotan ni Juda. Ti anak ni Atai ken ama ni Zabad. Ti apong ni Natan ket maysa nga Egipcio nga adipen nga agnagan Jarha.​—1Cr 2:3, 34-36.

2. Maysa a mammadto ni Jehova bayat ti panagturay ni David; nalabit kameng ti tribu ni Levi. Idi a ti ari impalgakna ken Natan ti tarigagayna a mangibangon iti templo maipaay iti panagdaydayaw ken Jehova, insungbat ti mammadto: “Isuamin nga adda ita pusom​—inka, aramidem.” (2Sm 7:1-3; 1Cr 17:1, 2) Nupay kasta, iti dayta a rabii, ni Jehova impakaammona ken Natan nga imbes a ni David ti mangibangon iti templo, ni Jehova mangibangon iti agpaut a balay agpaay ken David, ket inton agangay, ti putot ni David ti mangibangon iti balay ni Jehova. Iti kasta, babaen ken Natan, ni Jehova impakaammona ken David ti maysa a tulag maipaay iti pagarian “agingga iti tiempo a di nakedngan” iti linia ni David.​—2Sm 7:4-17; 1Cr 17:3-15.

Iti naud-udi a tiempo, ni Jehova imbaonna ni Natan tapno ipabigbigna agpadpada ti kadagsen ti basol ni David maikaniwas ken Urias a Heteo mainaig ken Bat-seba ken ti pannusa nga ipataw ti Dios gapu iti dayta. Sitataktika nga inaramidna daytoy ngem nabuyogan iti kinainget, a nangusar iti maysa a pangngarig. Iti kasta, natignay ni David a mangyebkas, a saanna a napupuotan ken awanan panangidumduma, iti mismo a panangukomna iti kasta a tignay. Idin impakaammo kenkuana ni Natan: “Sika a mismo ti lalaki!” ket insawangna ti panangukom ni Jehova maibusor ken David ken iti balayna.​—2Sm 12:1-18; kitaenyo met ti Sal 51:Sup.

Idi agangay, ni Bat-seba inyanakna ken David ti maikadua nga anak, a napanaganan iti Solomon. Inayat ni Jehova daytoy nga ubing; gapuna, imbaonna ni Natan a mammadtona, ket “maipagapu ken Jehova,” pinanagananna ti ubing iti Jedidias, a kaipapananna ti “Dungdungnguen ni Jah.” (2Sm 12:24, 25) Kabayatan ti maudin nga al-aldaw ti biag ni David ken idi ginandat ni Adonias nga agawen ti trono, nangaramid ni Natan kadagiti maiparbeng nga addang tapno maiyeg dayta a banag iti atension ni David. Kalpasanna nakiraman ni Natan iti panangpulot ken panangisaad ken Solomon kas ari.​—1Ar 1:5-40.

Agparang a ni Natan, agraman ni Gad, binalakadanna ni David maipapan iti umiso a pannakaaramat dagiti pagtokar iti musika mainaig iti santuario. (2Cr 29:25) Nalawag, da Natan ken Gad dagidiay nausar a mangirekord iti impormasion nga adda kadagiti pangleppas a kapitulo ti Umuna a Samuel ken iti intero a Maikadua a Samuel. (1Cr 29:29) “Kadagiti sao ni Natan a mammadto,” nairekord met ‘dagiti pasamak ni Solomon.’​—2Cr 9:29.

Mabalin a daytoy a Natan ti ama da Azarias ken Zabud, nga agpadpada a nagtakem kadagiti napateg a saad bayat ti panagturay ni Solomon. Ni Azarias ket prinsipe a manangaywan kadagiti diputado, idinto ta ni Zabud nagserbi kas padi ken kasta met a nasinged a gayyem ken manangbalakad ti ari.​—1Ar 4:1, 5.

3. Ti ama ni Igal ken kabsat ni Joel, dua kadagiti nabileg a lallaki iti buyot ni David.​—2Sm 23:8, 36; 1Cr 11:26, 38.

4. Anak ni David babaen iti asawana a ni Bat-seba, nayanak kenkuana idiay Jerusalem. (2Sm 5:13, 14; 1Cr 3:5) Ti nainkasigudan a kapuonan ti Mesias matunton, manipud ken David nga aglasat ken Natan ken kadagiti kaputotanna agingga ken Jesus, nalawag a babaen iti ina ni Jesus a ni Maria. (Lu 3:23, 31) Maipapan iti tiempo inton ‘kumitada iti Daydiay a dinuyokda,’ kunaen ti padto ni Zacarias nga addanto napait a panagun-unnoy ken panagdung-aw iti intero a daga, tumunggal pamilia, ken nangnangruna maipuon kadagiti pamilia ni David, ni Levi, dagiti Simeita, ken “ti pamilia ti balay ni Natan.” (Zac 12:10-14) No ti pamilia ti balay ni Natan a nadakamat ditoy ket nagtaud iti anak ni David, daytoy ti mamagbalin iti dayta kas maysa kadagiti pamilia ni David. Gapuna, ti panagun-unnoy apektaranna dagiti pamilia iti uneg dagiti pamilia.

5. Maysa kadagiti siam a pannakaulo dagiti destiero a nagpakarso iti karayan Ahava, isuda nga imbaon ni Esdras a mangilista kadagiti ministro maipaay kadagiti panagserbi iti balay ti Dios idiay Jerusalem.​—Esd 8:15-17.

6. Sigud a destiero idiay Babilonia, ken maysa kadagiti 13 nga annak ni Binui a nangpapanaw iti ganggannaet nga assawada a babbai kas panagtungpalda kadagiti pammilin ni Esdras.​—Esd 10:10, 11, 38-42, 44.