NERGAL

Maysa a didiosen ti Babilonia a kangrunaan a napagdaydayawan idiay Cuta, maysa a siudad a naidedikar ken Nergal sigun iti pakasaritaan. Daytoy a didiosen ket intultuloy a pinagdaydayawan dagiti umili ti Cut (Cuta) a pinagnaed ti ari ti Asiria iti teritoria ti Samaria. (2Ar 17:24, 30, 33) Kunaen ti dadduma nga eskolar a ni Nergal ket sigud a nainaig iti apuy ken iti pudot ti init ket idi agangay naibilang kas maysa a dios ti gubat ken panaganup kasta met a manangyeg iti angol. Ipasimudaag ti dadduma pay nga awag ken Nergal kadagiti narelihiosuan a teksto nga isu ket kangrunaanna a naibilang kas manangdadael. Isu ket naawagan “naranggas nga ari,” “daydiay naranggas,” ken “daydiay manguram.” Naibilang met ni Nergal kas dios ti lubong dagiti natay ken asawa ni Eresh-Kigal. Naikuna a ti simbolo ni Nergal ket nagpayak a leon a tao ti ulona.

Nabatad a ti nagan daytoy a dios ket naipanagan ken Nergal-sarezer a Rabmag, maysa kadagiti prinsipe ni Ari Nabucodonosor.​—Jer 39:3, 13.