NETOFA

[nagtaud iti sao a kaipapananna ti “agtedted; agregreg”], Dagiti Netofatita.

Bassit a purok daytoy iti Juda ken dagiti umili iti dayta. Nalabit adda dayta idiay Khirbet Bedd Faluh, agarup 4 km (2.5 mi) iti abagatan nga abagatan-a-daya ti Betlehem. Dagiti umili iti dayta ti ad-adda a dinakamat ti Biblia, ken mabalbalin a nainaigda kadagidiay nagyan idiay Betlehem idi damo.​—1Cr 2:54.

Netofatita met ti sumagmamano kadagiti nabileg a lallaki ni David nga isu da Maharai ken Heleb (Heled; Heldai), nga agpada a nagbalin a pannakaulo dagiti benneg ti buyot. (2Sm 23:8, 28, 29; 1Cr 11:26, 30; 27:13, 15) Adda sumagmamano a Netofatita a nabati idiay Juda kalpasan ti nasaknap a pannakaidestiero idiay Babilonia, ket sinuportaranda ni Gobernador Gedalias. (2Ar 25:23; Jer 40:8) Ti adu a Netofatita a kaputotan dagidiay naipan idiay Babilonia ket nagsubli a kadua ni Zorobabel idi 537 K.K.P. (Esd 2:1, 2, 22; Ne 7:26) Napan met idiay Jerusalem ti sumagmamano a Levita nga agnanaed idi iti purpurok dagiti Netofatita tapno dumar-ayda iti inagurasion ti nabangon manen a pader.​—1Cr 9:14, 16; Ne 12:27, 28.