ARITOS TI AGONG

Pagarkos a singsing a nayaruat iti agong. Nayusok dayta iti makannigid wenno makannawan a sikigan ti agong wenno iti baet a namaglasin kadagiti abut ti agong ket ti babbai ti nangnangruna a nagaruat iti dayta. (Ge 24:22, 30, 47; Isa 3:21) Nupay kasta, sigun iti sumagmamano a patarus, nagaruat met dagiti Ismaelita a lallaki kadagiti aritos ti agong.​—Uk 8:24-26.

Ti Hebreo a sao maipaay iti “aritos ti agong” (neʹzem) mabalin met nga agaplikar iti aritos ti lapayag, ket iti sumagmamano a kaso, mabalin a bassit laeng ti nagdumaan ti porma dagitoy nga arkos. No dadduma, ti konteksto ti mamagbalin a posible iti panangammo no ti matuktukoy ket aritos ti agong wenno aritos ti lapayag.​—Idiligyo ti Ge 24:47 iti Ge 35:4; Eze 16:12; kitaenyo ti SINGSING.

Nupay dagiti aritos ti agong gagangay a naaramid iti balitok, naaramat met ti dadduma pay a material, kas iti pirak. Dagiti aritos ti agong mabalin a naarkosan iti batbatek, pedpedaso ti korales, wenno saniata, nga agpaay kas babassit a pabitin. Ti diametro dagiti aritos ti agong nagduduma manipud 2.5 agingga iti 7.5 cm (1 agingga iti 3 pul.). Yantangay agbibitin idi agingga iti ngiwat, kasapulan a maiwalin ti aritos ti agong bayat ti pannangan.

Iti Proverbio 11:22, ti babai a napintas ti makinruar a langana ngem laksidenna ti kinasimbeng ket nayasping iti “balitok nga aritos ti agong iti subsob ti baboy.”