ODED

[Nangpabang-ar [ti Dios]].

1. Ama ni mammadto Azarias. (2Cr 15:1) Ti 2 Cronicas 15:8 dakamatenna ni Oded kas maysa a mammadto: “Apaman a nangngeg ni Asa dagitoy a sasao ken ti padto ni Oded a mammadto.” Ikkaten ti sumagmamano nga eskolar ti sasao a “ni Oded a mammadto” ta ibilangda a dayta ket biddut ti managkopia, ngem saan nga ilawlawag daytoy no apay a ti mannurat kunaenna a nangngeg ni Asa “dagitoy a sasao ken ti padto.” Ti dadduma nga eskolar mangikabilda iti kanayonan a sasao tapno mabasa kas, “Nangngeg ni Asa dagitoy a sasao ken ti padto ni Azarias nga anak ni Oded,” iti kasta tumunos iti Griego a Septuagint (Alexandrine Codex), Syriac a Peshitta, ken ti Latin a Vulgate (kritikal a rebision ni Clemente), ngem saanna latta a mailawlawag ti parikut a nadakamaten. Ti maikatlo a solusion isu ti panangakseptar no ania ti adda iti Masoretiko a teksto, ket tarusan a ni Oded a mismo nangipaay iti padto a saan a napagtalinaed iti rekord. Impangag ni Asa ti sasao ni Azarias (2Cr 15:2-7) ken ti sasao ni amana nga Oded.

2. Maysa a mammadto ti Samaria bayat dagiti tiempo a nagsinnaknib ti panagturay da Peca ti Israel ken Acaz ti Juda (762-a. 759 K.K.P.). Kalpasan ti nakaro a pannakaabak ti Juda iti im-ima ti Israel ken Siria, naipan idiay Samaria ti 200,000 a kautibo manipud makin-abagatan a pagarian. Nupay kasta, linapdan ni Oded ti nagballigi a buyot ket pinakdaaranna ida a di la ket ta mapagpungtotda ti Dios no adipenenda ti kakabsatda. Inlawlawagna kadakuada: ‘Kinaagpaysuanna, impalubos ni Jehova a maparmekyo ida maigapu laeng iti kinadakes ti Juda. Ita dikay pagbalinen ida nga ad-adipen, di la ket ta ipagtengyo iti bagbagiyo ti pungtot ni Jehova; isubliyo dagiti kautibo!’ Uppat nga Efraimita a panguluen ti nangsuportar ken Oded, ket nataripato ken naisubli dagiti kautibo.​—2Cr 28:5-15.