ORPA

Ti Moabita nga asawa ni Kilion; manugang met ni Noemi, a kas ken Ruth. (Idiligyo ti Ru 1:3-5 iti 4:10.) Kalpasan a natay ti assawa da Noemi, Orpa, ken Ruth, rinugian dagitoy nga awanan annak a balo ti agdaliasat manipud Moab nga agpa-Betlehem. Bayat ti panagdaliasatda, indagadag ni Noemi iti dua a manugangna nga agawiddan iti pagtaengan ti innada ken makiasawada idiay Moab, ngem agpada a kinunkunada ken Noemi, “Saan, no di ket kaduanakamto nga agsubli kadagiti kailiam.” Nakaim-imbag ni Orpa iti katuganganna, a nalawag nga impatpategna. (Ru 1:8-10) Ti panagtarigagayna nga agtultuloy a makikadua ken Noemi ket mabalin a gapu ta nagustuanna metten ti biag iti pamilia dagiti Israelita. Ngem inggunamgunamen ni Noemi a no makikadua latta kenkuana dagitoy dua a balo a Moabita, dakkel ti posibilidadna nga agbakbaketdanton a balo idiay Juda, ta saan unayen nga inanamaen ni Noemi a maasawaan pay tapno makaipasngay iti annak a lallaki. Ket uray pay no mapasamak daytoy, masiguradona a saan a kayat da Orpa ken Ruth ti aguray agingga nga agmataengan dagita nga annak tapno asawaenda dagitoy a balo a Moabita nga ipagda. Saan a nakaanay ti kinabileg ti panagayat ken panangipateg ni Orpa tapno kumuyog pay laeng iti laksid ti kasta a posible a masanguanan. Isu a kalpasan ti napalalo a panagsangit, nagpakadan kada Noemi ken Ruth ket nagsublin “kadagiti kailianna ken kadagiti diosna.”​—Ru 1:3-15.