PARAN
Ti kalawaan a rehion ti let-ang a nagallaallaan ti nasion ti Israel iti agarup 38 a tawen sakbay ti iseserrekda iti Naikari a Daga. (Nu 10:11, 12; De 2:14) Nupay awan ti espesipiko a pagbedngan ti Paran, saklawenna ti makintengnga ken makin-amianan a daya a benneg ti Peninsula ti Sinai. Adda ti kapaset ti Yuyeng a Ginget a pagaammo kas Araba ken kasta met ti Gulpo ti ʽAqaba iti daya; adda met ti Let-ang ti Sinai iti abagatan; masarakan met ti Let-ang ti Sin iti abagatan a laud; ket dagiti Let-ang ti Etam ken Sur addada iti amianan a laud ken amianan. Iti panagpaamianan a daya ti Paran nga agturong iti Natay a Baybay, kumamang wenno nalabit saklawenna ti Let-ang ti Zin ken mabalin a dumanon pay ketdi agingga iti Beer-seba iti asideg ti bambantay ti Juda.—1Sm 25:1, 2.
Ti kaaduan a paset ti Paran ket likkalikkaong a kabambantayan a rehion ti apug a bato, nalantag ti adu a pasetna, a ti kangato ti makintengnga a pasetna ket 600 agingga iti 750 m (2,000 agingga iti 2,500 pie). (De 33:2; idiligyo ti Hab 3:3.) Nairaman met iti “dakkel ken nakaam-amak a let-ang” a natukoy iti Deuteronomio 1:1, 19; 8:15. Awan berde a mulmula iti graba a rabaw daytoy tibbatibbakol a daga malaksid kadagiti ababa a natutudo a paniempo; manmano dagiti ubbog ken agiinnaddayo dagita. Dagitoy a kasasaad ti mangipaganetget no kasano a naan-anay a nagpannuray ken Jehova ti nasion ti Israel, a nalabit nagdagup iti 3,000,000 a tattao, maipaay iti namilagruan a panangipaayna iti taraon ken danum bayat ti adu a tawen a panagallaallada iti let-ang.—Ex 16:1, 4, 12-15, 35; De 2:7; 8:15, 16.
Nalawag a ti damo a pannakatukoy daytoy a Let-ang ti Paran ket idi kaaldawan ni Lot, idi inabak ni Kedorlaomer ken dagiti kaaliansana ti adu a siudad iti aglawlaw ti Natay a Baybay ken ti Edom agingga iti abagatan iti El-paran. (Ge 14:4-6) Idi agangay, kalpasan a ni Ismael ket pinagtalaw ni amana nga Abraham, nagnaed iti Let-ang ti Paran ket nagbalin a mangnganup.—Ge 21:20, 21.
Nupay kasta, kangrunaan a natukoy ti Paran mainaig kadagiti panagallaalla dagiti Israelita. Kalpasan a pimmanawda iti Bantay Sinai, nagpakarso ti Israel idiay Tabera ken Kibrot-hataava, kalpasanna idiay Hazerot iti makin-abagatan nga igid ti Paran, sakbay a nagpaamiananda nga agturong iti Cades-barnea. (Nu 10:12, 33; 11:3, 34, 35; 12:16) Di nagbayag kalpasan ti iseserrekda iti let-ang ti Paran, naibaon ti 12 a managsimisim tapno sukimatenda ti Canaan. (Nu 13:3, 26) Gapu iti negatibo nga impadamag ti sangapulo a managsimisim apaman a nakasublida, inkeddeng ni Jehova a bumayag ti panagyan ti nasion iti daytoy a let-ang agingga a matay ti amin a nagtanabutob iti Dios a karaman a nairehistro. (Nu 13:31-33; 14:20-34) Bayat dayta nga 40 a tawen, idiay Paran ti kaaduan a nagpakarsuan ti Israel, iti panagdaliasatda manipud Egipto agingga iti Naikari a Daga.—Nu 33:1-49.
Sigun iti Griego a Septuagint, napan ni David idiay Let-ang ti Maon kalpasan ti ipapatay ken pannakaitabon ni Samuel. Nupay kasta, kunaen ti Masoretiko a teksto, ti Syriac a Peshitta, ken ti Latin a Vulgate a napan ni David idiay Let-ang ti Paran. (1Sm 25:1) Idi nagbalin ni David nga ari ken nakigubat iti Edom, nakatalaw nga agturong idiay Egipto ti agtutubo nga Edomita a prinsipe a ni Hadad, agraman ti sumagmamano kadagiti adipen ni amana. Iti dalanda a sumalog, kimmadua kadakuada ti sumagmamano a lallaki ti Paran bayat ti ilalasatda iti dayta a pagilian.—1Ar 11:15-18.