PATROS

Ti Patros ket kanayon a nainaig iti Egipto (Heb., Mits·raʹyim). (Eze 30:13, 14) Kaaduan nga eskolar inaigda ti nagan a Patros iti Egipcio a sasao a kaipapananna ti “Daga ti Abagatan” ken nabatad a tumukoy iti Makinngato nga Egipto. Ti Makinngato nga Egipto ket gagangay a tumukoy iti rehion ti Ginget Nilo manipud iti abagatanen ti Memfis a sumang-at (abagatan) agingga iti Siene (moderno nga Aswan) iti umuna a dissuor ti Nilo. Ti teksto iti Isaias 11:11, a mangipadto iti isusubli dagiti destiero nga Israelita manipud ‘Egipto (Mizraim), Patros ken Cus,’ agparang a pasingkedanna ti kaadda ti Patros iti maysa a paset ti Makinngato nga Egipto, a ti beddengna iti abagatan ket Cus (Etiopia). Ti maysa nga Asirio a kitikit ni Ari Esar-haddon tukoyenna ti kasta met laeng a panagsasaganad, a dakamatenna ti “Egipto (Musur), Paturisi ken Nubia [Kusu, wenno Cus].”​—Ancient Near Eastern Texts, inurnos ni J. Pritchard, 1974, p. 290.

Ti Ezequiel 29:14 awaganna ti Patros iti “daga a namunganayan [dagiti Egipcio].” Nalawag a pasingkedan daytoy ti nabayagen a patpatien dagiti Egipcio, kas imbinsabinsa ni Herodotus (II, 4, 15, 99), ta kunaenda a ti Makinngato nga Egipto, ken nangnangruna ti rehion ti Thebes, ti ayan ti pagturayan ti umuna nga Egipcio a pagarian, iti panangidaulo ti ari nga awagan ni Herodotus iti Menes, nagan a saan a nasarakan kadagiti rekord ti Egipto. Inlanad ni Diodorus Siculus (umuna a siglo K.K.P.) ti umasping a panangmatmat. (Diodorus of Sicily, I, 45, 1) Ti nabayagen a patpatien dagiti Egipcio nga indatag dagitoy a Griego a historiador ket saanna a naan-anay a mayanninaw ti pudpudno a historia a naiparang iti Biblia maipapan ken Mizraim (a ti naganna intakderanna ti Egipto) ken dagiti kaputotanna, agraman ni Patrusim.​—Ge 10:13, 14.

Kalpasan a naglangalang ti Juda gapu ken Nabucodonosor, dagiti natda a Judio nagkamangda idiay Egipto. Karaman kadagiti lugar a nailanad a nagnaedanda isu ti Migdol, Tapanhes, Nof (siudsiudad ti Makimbaba nga Egipto), ken ti “daga ti Patros.” (Jer 44:1) Ditoy a nagdaydayawda kadagiti idolo, a nagbanag iti panangkondenar kadakuada ni Jehova ken panangipakdaarna iti um-umay a pannakaparmek ti Egipto babaen ken Nabucodonosor. (Jer 44:15, 26-30) Ti papiro nga ebidensia iti maikalima a siglo K.K.P. ipakitana ti maysa a kolonia dagiti Judio a dumanon agingga iti makin-abagatan nga ungto ti kadaanan nga Egipto idiay Elephantine iti abay ti Siene.