AGAY-AYWAN KADAGITI KUARTEL

Mabalin a ti opisial nga agay-aywan kadagiti rasion ken abasto maipaay kadagiti buyot. Ti literal a patarus ti Hebreo a sar menu·chahʹ ket “prinsipe ti lugar a paginanaan” ken mabalin a kaipapananna ti maysa nga agay-aywan kadagiti pagnanaedan a kuartel ti ari no adda iti maysa a panagkampania wenno panagbaniaga. Ni Seraias kas agay-aywan kadagiti kuartel maipaay ken Ari Zedekias ti Juda kimmuyog kenkuana iti panagdaliasat nga agturong iti Babilonia idi maikapat a tawen ti panagturay ni Zedekias, nga awitna ti naisurat a padto ni Jeremias maibusor iti Babilonia. Kalpasan nga imbasana a sipipigsa iti dayta a siudad, impuruak ni Seraias dayta, a naigalut iti maysa a bato, iti Eufrates, kas simbolo ti masanguanan a pannakarba ti Babilonia, a saanen a pulos rumkuas.​—Jer 51:59-64.