REHOBOT

[Dagiti Akaba a Disso].

1. Ti impanagan ni Isaac iti maysa a bubon a kinalina. (Ge 26:22) Nupay saanda a sigurado, kunaen ti dadduma nga eskolar nga isu dayta ti Rehobot iti Ruheibeh (Horvat Rehovot [ba-Negev]), agarup 35 km (22 mi) iti abagatan a laud ti Beer-seba. Adda sumagmamano a pagpadaan dagita a nagan. Idi pinanaganan ni Isaac dayta a bubon, kinunana a ti Dios ket nangipaay iti nalawa a pagyanan. Mabalin a rumang-ay ni Isaac agraman dagiti pastorna nga awan ti makibiang wenno sumupiat kadakuada.

2. Maysa a siudad a saan nga ammo ti ayanna; dayta ti naggapuan ni Shaul a nagkauna nga Edomita nga ari. (Ge 36:31, 37; 1Cr 1:43, 48) Kadagiti dua a nakatukoyan dayta a lugar, naawagan iti “Rehobot iti denna ti Karayan.” Iti Biblia, gagangay a ti awag a “Karayan” ket tumukoy iti Eufrates. (Sal 72:8; 2Cr 9:26; idiligyo ti Ex 23:31 ken De 11:24.) Gapuna, kunaen ti dadduma a geograpo a mabalin nga isu dayta ti maysa kadagiti dua a disso iti asideg ti pagsabtan dagiti karayan Khabur ken Eufrates. No kasta ngarud, naggapu ni Shaul iti siudad nga adayo iti ruar ti teritoria dagiti Edomita. Nupay kasta, adda dagiti moderno a geograpo a mamati a kadagitoy dua a gundaway, ti “Karayan” tumukoy iti maysa a karayan iti Edom wenno iti asideg ti maysa kadagiti beddengna, kas iti Zered (Wadi el-Hasaʼ) a kumamang iti makin-abagatan nga ungto ti Natay a Baybay. Isingasing ti geograpo a ni J. Simons ti maysa a disso nga agarup 37 km (23 mi) iti abagatan a daya ti murdong ti Natay a Baybay.