PANAGRETIRO
Ti panagsardengen ti maysa a tao iti trabahona wenno panagsardengnan a mangaramid iti sumagmamano a paset dayta.
Idi intuding ni Jehova dagiti Levita (saan a kameng ti papadi a pamilia ni Aaron) nga agserbida iti tolda ti gimong iti sidong ti panangiwanwan ti papadi, nangaramid met kadagiti naayat nga urnos maipaay a pagimbaganda. Binilinna ni Moises: “Daytoy ti agpaay kadagiti Levita: Manipud duapulo ket lima ti tawenna nga agpangato umayto tapno sumrek iti bunggoy iti panagserbi iti tolda ti gimong. Ngem kalpasan ti edad a limapulo a tawen isu agsardengto (wenno, agretironto) manipud bunggoy ti panagserbi ket saanen nga agserbi. Ket masapul nga agserbi iti kakabsatna iti tolda ti gimong iti panangasikaso iti pagrebbengan, ngem saanto a mangipaay iti panagserbi.”—Nu 8:23-26; 1Cr 23:3.
Nadeskribir iti Numeros kapitulo 4 ti pannakaorganisar ti panagserbi dagiti Levita. Nadakamat sadiay a maipasalista dagiti agedad iti 30 agingga iti 50.
Nakadagdagsen a trabaho ti panangsangal, panangsinasina, ken panangidaliasat iti tolda ti gimong. Ti 96 a sulluop a batay a pirak maipaay kadagiti baskag ti diding ket agdagsen iti maysa a talento (a. 34 kg; 92 lb t) tunggal maysa; adda met uppat a batay a maipaay kadagiti adigi iti nagbaetan ti Nasantuan ken Kasasantuan a benneg, a nalabit agpapada ti dagsenda, ken lima a gambang a batay a maipaay kadagiti adigi iti pagserkan ti tabernakulo. (Ex 26:19, 21, 25, 32, 37; 38:27) Ti 48 a baskag ti diding (4.5 m [14.6 pie] a kaatiddog; 67 cm [26 pul.] a kaakaba) ket naaramid iti akasia, maysa a napino ti binggasna, nadagsen a kayo, a nakalupkopan iti balitok. (Ex 26:15-25, 29) Adda balbalunet a nakalupkopan iti balitok, a dagitoy ket naipaurnos iti tunggal sikigan ken naiballangan iti likud ti tabernakulo. (Ex 26:26-29) Nadagsen amin dagitoy. Mainayon pay dagiti adda dagdagsenna nga abbong a lalat ti foka, lalat ti kalakian a karnero, muldot ti kalding, ken lienso, kasta met ti lienso a tabing iti aglikmut ti paraangan, agraman dagiti adigina, sulluop a batbatay, paspasok ti tolda, ken dadduma pay. Gapuna agkasapulan iti napuersa a panagtrabaho ti panangasikaso iti tabernakulo. (Ex 26:1-14; 27:9-19) Innem a kareson ti aramatenda a pangiluganan kadagitoy a banag. Ngem ibaklay dagiti Cohatita ti nasantuan nga alikamen ken ar-aruaten iti tolda ti gimong agraman ti altar ti sakripisio a nakalupkopan iti gambang, ken ti tabing ti Kasasantuan bayat a magmagnada.—Nu 4:4-15; 7:7-9.
Ti sabali pay a panggep ti urnos a panagretiro ket nalawag a tapno maipaayan amin a Levita iti gundaway a makapagannong iti santuario, gapu ta nakedngan laeng a bilang ti kasapulan, nangnangruna idi tolda ti gimong wenno tabernakulo pay laeng ti maar-aramat. Awan ti urnos nga agretiro dagiti papadi, dagiti Levita iti pamilia ni Aaron.
Nabatad nga adda lima-tawen a periodo ti panagserbi ti Levita a mabalin nga awagan iti “panagsanay,” manipud kadagiti edad a 25 agingga iti 30.” Mabalin a saan a naaramat dagitoy ub-ubing a Levita kadagiti nadagsen nga annongen, a nairanta nga agpaay kadagiti 30 ti tawenda wenno laklakay pay—nataenganen a lallaki. (Kitaenyo ti EDAD.) Idi agangay, kalpasan a ti Lakasa permanenten a naisaad idiay Bantay Sion (ken nangnangruna idi dandanin maibangon ti templo), awanen ti nadagsen a trabaho a panangawit iti santuario. Ngarud inyurnos ni David a dagiti Levita mangrugida nga agserbi iti edad a 20. Awan duadua a maigapu ta ad-adun ti kasapulan iti templo a mangasikaso kadagiti immadu unayen a panagserbi sadiay.—1Cr 23:24-27.
Dagiti Levita a nagretiro iti edad a 50 saanda a nagsardeng iti isuamin a panagserbi. Mabalinda latta ti boluntario nga agserbi ken “agserbi iti kakabsat[da] iti tolda ti gimong iti panangasikaso iti pagrebbengan.” (Nu 8:26) Nalabit nagserbida kas manangbalakad ken timmulongda a mangasikaso iti sumagmamano kadagiti nalaglag-an a trabaho a karaman iti pagrebbengan dagiti Levita, nupay saandan nga agtrabaho iti nadadagsen. Ken agserbida latta a manangisuro iti Linteg kadagiti umili. (De 33:8-10; 2Cr 35:3) Dagidiay sumagmamano kadakuada nga agnanaed kadagiti siudad a pagkamangan ket makatulong unay kadagidiay nagkamang sadiay.
Ti Nakristianuan a Ministerio. Dagidiay agbalin a naespirituan a “kakabsat” ni Jesu-Kristo ken sumursurot kadagiti addangna maaw-awaganda iti “maysa a naarian a kinapadi.” (Heb 2:10-12; 1Pe 2:9) Awan ti urnos nga agretiro dagitoy. Aktibo ni apostol Pablo iti ministeriona bayat ti kaaddana iti pagbaludan ken intultuloyna latta ti napinget a panagministeriona agingga a napapatay. (Ara 28:30, 31; 2Ti 4:6, 7) Nagtultuloy nga aktibo ni Pedro agingga a nagpatingga ti biagna. (2Pe 1:13-15) Lakay unayen ni Juan idi insuratna ti Ebangheliona ken ti tallo a kanonikal a suratna idi agarup 98 K.P.
Ti “dakkel a bunggoy,” a nakita ni Juan kalpasan ti pannakasirmatana iti 144,000 a “naselioan,” ket nadakamat a “mangipapaayda [iti Dios] iti sagrado a panagserbi iti aldaw ken rabii,” wenno agtultuloy. Ngarud saan nga agretiro ti asinoman a Kristiano iti panagserbina iti Dios.—Apo 7:4, 9, 15.