REZIN

1. Ari ti Siria a nagturay idiay Damasco kabayatan ti panagturay ni Ari Jotam (777-762 K.K.P.) iti Juda ken ti anakna a ni Ari Acaz (a ti nagpatingga ti panagturayna idi 746 K.K.P.).

Nabatad nga idi dandani agngudon ti panagturay ni Jotam, nakikappon ni Rezin ken Peca nga ari ti Israel tapno makigubatda iti Juda. (2Ar 15:36-38) Bayat ti gubat, a nagtultuloy agingga iti panagturay ni Acaz, dagiti Sirio a nabatad nga indauluan ni Rezin kinautiboda ti adu nga umili ti Juda ket impanda ida idiay Damasco. (2Cr 28:5) Kasta met, inagaw ni Rezin ti siudad ti Elat iti Gulpo ti ʽAqaba manipud iti Juda, a pinagtalawna dagiti Judio ken insublina ti siudad kadagiti Edomita. (2Ar 16:6) Dagiti nagtipon a puersa ti Siria ken Israel linakubda ti Jerusalem, a pinanggepda a pagbalinen “ti anak ni Tabeel” kas ari dayta, ngem saanda a nabaelan a kautibuen ti siudad. (2Ar 16:5; Isa 7:1, 6) Gapu iti dayta, kasta unay ti buteng ni Acaz, nupay impasigurado ni Isaias a saanna a masapul a pagbutngan ni Rezin ti Siria ken ni Peca ti Israel. (Isa 7:3-12; 8:6, 7) Nagpatulong ni Acaz iti Asiria babaen ti panangpasuksokna ken Tiglat-pileser III tapno rautenna ti Siria.​—2Ar 16:7, 8; 2Cr 28:16, 20.

Ginubat ngarud ni Tiglat-pileser III ti Damasco, a kinautibona dayta ken pinapatayna ni Rezin. Iti kasta, ti Asiria sinakupna ti Siria.​—2Ar 16:9.

2. Ti ama ti maysa a pamilia dagiti Netineo, a ti sumagmamano kadakuada ket nagsubli idiay Jerusalem manipud Babilonia idi 537 K.K.P.​—Esd 2:1, 43, 48; Ne 7:6, 46, 50.