PARAGPAG
Iti bagi ti tao, adda 24 kadagitoy nga atitiddog, narapis, bakkug a tultulang a mangtikub iti ungib ti barukong. Naurnos iti 12 a paris, buklenda ti maysa a kaha a mangsalaknib iti puso ken bara. Mapatpataud ti dara iti pata dagiti tulang ti paragpag.
Iti pannakaparsua ti babai, isu saan a pinagbalin ti Dios a naiduma ken naisalsalumina iti lalaki babaen ti panangbukelna kenkuana manipud tapok ti daga, kas inaramidna iti panangparsua ken Adan. Nangala iti maysa a paragpag iti bakrang ni Adan, ket manipud iti dayta inyaramidanna ni Adan iti perpekto a kapareha, ti babai a ni Eva. (Ge 2:21, 22) Nupay kasta, ni Adan, a nagtalinaed a perpekto a tao, naikaykaysa itan iti asawana kas ‘tulang ti tulang ken lasag ti lasag.’ (Ge 2:23; De 32:4) Mainayon pay, saan a dinadael daytoy dagiti selula ni Adan iti panagpaadu tapno apektaranna ti annakna, lallaki wenno babbai, iti pannakasangal ti paragpagda. Ti natauan a lalaki ken babai agpadada nga addaan iti 24 a paragpag.
Makapainteres a paliiwen a ti maysa a paragpag a naikkat agtubonto manen, a masuktan a mismo, la ketdi no mapagtalinaed ti periosteum (ti kulapot ti mamagkamang a tisyu a mangbalkut iti tulang). Saan nga ibaga ti rekord no sinurot ni Jehova a Dios daytoy a pamay-an wenno saan; nupay kasta, kas Namarsua iti tao, sigurado a ti Dios ammona daytoy di gagangay a kualidad dagiti tulang ti paragpag.
Ti sao a “paragpag” masarakan manen iti Biblia iti salaysay ni Daniel maipapan iti sirmata nga inted kenkuana ti Dios bayat ti panagturay ni Ari Belsazar ti Babilonia. Nagparang ti umuna nga animal a mangiladladawan iti dinastia a linia dagiti agtuturay iti Babilonia, a sinaruno ti maysa nga animal a kasla oso, a nangiladawan iti simmaganad nga ‘ari,’ wenno linia dagiti agtuturay iti lubong, awan sabali, dagiti agtuturay iti Medo-Persia. Daytoy kasla oso nga animal adda tallo a paragpag iti ngiwatna. Dagitoy a paragpag mabalin nga ipasimudaagda a ti ‘ari’ nga insimbolo ti oso pinagabantena dagiti panagparmekna iti tallo a turong, kas inaramid ti Medo-Persia. Yantangay ti numero a tallo maus-usar iti Kasuratan kas simbolo ti kinanasged wenno panangipaganetget, ti tallo a paragpag mabalin nga ipaganetgetda met ti kinaagum daytoy simboliko nga oso maipaay kadagiti panagparmek iti teritoria.—Da 7:5, 17; kitaenyo ti AN-ANIMAL, SIMBOLIKO NGA.