RIMMON
[Kayo a Granada].
1. Ti Benjamita nga ama da Baanah ken Recab, dagiti nangpapatay ken Is-boset nga anak ni Saul; taga Beerot iti amianan ti Gabaa.—2Sm 4:2, 5-7, 9.
2. Maysa a siudad iti tribu ni Simeon iti uneg ti tribu ni Juda. (Jos 19:1, 2, 7; “Remmon,” KJ) Nailanad ti Rimmon kalpasan ti siudad ti Ain, ket nalawag a ti nagan nga En-rimmon iti Nehemias 11:29 ket nagtipon a porma nga awag iti singin a siudad. Nadakamat dayta kas makin-abagatan a disso iti Zacarias 14:10. Dagiti rebba ti maysa a lugar a naawagan Khirbet Umm er-Ramamin (Horvat Remalya), agarup 15 km (9 mi) iti amianan ti Beer-seba, ket naipagarup a dayta ti nagkauna nga ayanna.
3. Maysa a siudad dagiti Levita iti pamilia ni Merari a masarakan iti makindaya a beddeng ti daga ti Zabulon (Jos 19:10, 13); nabatad a naawagan “Dimna” iti Josue 21:35 ken “Rimmono” iti 1 Cronicas 6:77. Maikunkuna nga isu ti Rummana (Rimmon), agarup 10 km (6 mi) iti amianan ti Nazaret.
4. Maysa a nangato ken dakkel a bato. Sadiay a nagkamang dagiti 600 a lallaki iti tribu ni Benjamin a nakalasat iti gubat iti asideg ti Gabaa, a ditoy a nakirupak ti intero nga Israel maibusor kadagiti Benjamita tapno ibalesda ti pannakarames ken pannakapapatay ti kamalala ti maysa a Levita. (Uk 20:45-47) Nagtalinaedda sadiay agingga a napan kadakuada dagiti naibaon a mangitukon iti kappia. (Uk 21:13) Daytoy a sigud a salindeg ket masarakan iti agarup 6 km (3.5 mi) iti daya ti Bethel ken 18 km (11 mi) iti amianan nga amianan-a-daya ti Jerusalem, ken pagaammo itan kas Rammun nga ayan ti maysa a bassit a purok. Adda maysa nga apug a bantay sadiay, nga agserbi a salaknibna dagiti baw-ang iti tallo a sikiganna ken addaan iti adu a rukib.
5. Maysa a dios ti Siria. Kalpasan a naagasan ti kukutel ni Naaman a panguluen ti buyot ti Siria, binigbigna ni Jehova kas pudno a Dios ngem maseknan gapu iti annongenna a panangkadua iti ari ti Siria no sumrek iti templo ni Rimmon ken agruknoy a kadua ti ari iti sanguanan ti idolo ni Rimmon, ta agsadag ti ari iti takiag ni Naaman.—2Ar 5:15-18.
Ni Rimmon ket gagangay a maikunkuna nga isu ni Ramman (kaipapananna ti “Managungor, Managgurruod”), maysa a dios a pagaammo a napagdaydayawan idiay Asiria ken Babilonia. Naikuna a ti panagdaydayaw ken Rimmon (Ramman) ket naipalaud manipud Asiria babaen iti sumagmamano a tribu a nagyan idi agangay iti likmut ti Damasco. Adu nga eskolar ti mangibaga a ti Rimmon (Ramman) ket titulo laeng ti dios-bagyo a ni Hadad (Adad). Yantangay ti Tabrimmon ken Ben-hadad ket nagnagan ti Sirio nga ar-ari, dagitoy ti pangibatayan nga agpada da Rimmon ken Hadad, agsipud ta mabalin a nasilpuan ti nagan dagitoy nga ar-ari iti nagan wenno titulo ti kangrunaan a diosda.—1Ar 15:18.
Ti Rimmon a napagdaydayawan idiay Siria ket nabatad nga adu ti pumadaanna ken Ramman. Kadagiti Asirio, ni Ramman ket kangrunaanna a dios ti bagyo ken gurruod. Naibilang nga ipapaay ni Ramman ti tudo ket ngarud ipapaayna ti danum kadagiti bubon ken talon, ngem nalatlatak a nainaig isuna kadagiti makadadael nga aspeto ti tudo ken kimat. Kadagiti monumento dagiti Asirio, maulit-ulit a nailadawan ni Ramman kas maysa a dios ti gubat. Naibilang met ni Ramman kas dios ti gubat idiay Babilonia ken kameng ti tinallo a dios, a kaduana ti dios-bulan a ni Sin ken ti dios-init a ni Shamash.