RODANIM

Nailanad kas maysa kadagiti uppat nga annak ni Javan iti 1 Cronicas 1:7. Saan a masigurado ti umiso nga ispeling ti nagan, yantangay ti Masoretiko a teksto iti 1 Cronicas 1:7 ilanadna ti “Rodanim,” idinto ta iti adu a Hebreo a manuskrito ken iti Latin a Vulgate mabasa ditoy ti “Dodanim.” Agparang met ti “Dodanim” iti Masoretiko a teksto iti Genesis 10:4, nupay “Rodanim” ti naaramat iti Griego a Septuagint ken iti Samaritano a Pentateuch. Iti Hebreo, agkaasping unay ti letra nga “r” (ר) ken “d” (ד) ket mabalin ngarud a mariro ti maysa a managkopia. (Gapuna ti “Rifat” iti Ge 10:3 agparang kas “Difat” iti 1Cr 1:6 iti Masoretiko a teksto.) Kaaduan a patarus inaramatda dagitoy a dua a nagan. Adu a leksikograpo ibilangda nga ad-adda nga umiso ti “Rodanim.” Dagiti komentarista a mangawat iti daytoy a patarus ibilangda a mabalin a ti ili a nagtaud iti daytoy nga anak ni Javan ket nagnaed iti isla ti Rodas ken dagiti kabangibang nga isla ti Baybay Aegeano.