KORSO

[Heb., yach·murʹ].

Ti kalakian ti bassit nga ugsa, maysa a bassit a kita nga umarngi iti gasela. Ti korso (Capreolus capreolus) agtayag iti nasurok a 0.6 m (2 pie) agingga iti abaga ken agrukod iti kaatiddog nga agarup 1.2 m (4 pie). Dagiti laeng kalakian ti addaan kadagiti ayud wenno sara, ket agregreg dagitoy iti kada tawen. Lumabaga a kayumanggi ti dutdot ti korso iti kalgaw, ket mabalin a daytoy ti nakaibatayan ti Hebreo a naganna a yach·murʹ, a naipagarup a nagtaud iti sao a kaipapananna ti “lumabaga.” Kaaduanna a saan a makipulpulapol daytoy nga animal. Mabalin a makita nga agkakapangan a sangsangkamaysa ti babassit a grupo a buklen ti tallo wenno uppat, ti kalakian nga ugsa, ti kabaian nga ugsa, ken ti maysa wenno dua a kigaw. Maysa laeng ti asawa ti korso iti intero a panagbiagna.

Yantangay managngatingat ken nagpisi ti kukona, ti korso maawat idi a pagtaraon sigun kadagiti kondision ti Mosaiko a Linteg. (De 14:5, 6) Ti lasag daytoy a parsua ket maysa kadagiti karne a kanayon a naiserbi iti lamisaan ni Ari Solomon.​—1Ar 4:22, 23.