ROS

1. Anak ni Benjamin a nailista a karaman kadagidiay napan idiay Egipto idi 1728 K.K.P. a kadua ti sangakabbalayan ni Jacob wenno nayanak di nagbayag kalpasan dayta. (Ge 46:21, 26; kitaenyo ti BENJAMIN Num. 1.) Ti saan a pannakailanad ti naganna kadagiti naud-udi a listaan ti Benjamita a pampamilia ket mabalin a mangipasimudaag a natay nga awanan anak wenno naitipon ti annakna iti sabali pay a pamilia ti tribu.

2. Nagan a masarakan iti sumagmamano a patarus ti Ezequiel 38:2 ken 39:1 (AS, JB, Le, LXX, Mo, Yg, Ro), nga imbilang ti dadduma nga eskolar kas awag kadagiti tattao a taga amianan a naawagan Rus (Ruso), a naikuna a nagnanaedda iti igid ti Karayan Volga. Nupay kasta, maibatay iti kaipapanan ti termino ken gapu ta nayaplikar iti Gog, mayanatup a maipatarus dayta kas paset ti maysa a titulo imbes a nagan ti maysa a grupo ti tattao wenno maysa a disso: iti kasta naipatarus a “kangrunaan a panguluen” (NW), “panguluen a prinsipe” (KJ, Dy, Fn, JP, RS), “naindaklan a prinsipe” (AT), “prinsipe a pannakaulo” ken “pannakaulo a prinsipe” (Vg), “panguluen ken pannakaulo” (Sy), “pannakaulo a naindaklan” (dagiti Targum).