SAGRADO A PANAGSERBI

Sagrado a ministerio wenno trabaho yantangay direkta a nainaig iti panagdaydayaw iti Dios.

Ti Hebreo a termino nga ʽa·vadhʹ ket kangrunaan a kaipapananna ti “agserbi” (Ge 14:4; 15:13; 29:15) wenno “agbannog” (Ex 34:21) ken naipatarus met nga “agtalon, agsukay.” (Ge 4:12; De 28:39) No maaramat a tumukoy iti panagserbi ken Jehova wenno kadagiti ulbod a didiosen, ti ʽa·vadhʹ ipasimudaagna ti panagdaydayaw, wenno sagrado a panagserbi. (Ex 10:26; De 11:16) Kasta met, ti Griego a berbo a la·treuʹo ket tumukoy iti panagserbi. Naaramat dayta maipapan iti panagserbi iti Dios (Mt 4:10; Lu 1:74; 2:37; 4:8; Ara 7:7; Ro 1:9; Fil 3:3; 2Ti 1:3; Heb 9:14; 12:28; Apo 7:15; 22:3), kas iti naaramid iti santuario wenno templo (Heb 8:5; 9:9; 10:2; 13:10), ken kasta met a mainaig iti ulbod a panagdaydayaw, panagserbi iti naparsua a bambanag. (Ara 7:42; Ro 1:25) Iti Kristiano a Griego a Kasuratan, ti nombre a la·treiʹa ket agparang a tumukoy laeng iti panagserbi iti Dios. (Jn 16:2; Ro 9:4; 12:1; Heb 9:1, 6) Naiduma dayta iti Griego a di·a·ko·niʹa, a kaipapananna met ti “ministerio, panagserbi,” ngem naaramat mainaig iti kadawyan, ordinario, gagangay a bambanag​—bambanag a saan a sagrado.

Daydiay kakaisuna a pangipaayan iti panagdaydayaw wenno sagrado a panagserbi ket isu ni Jehova a Dios. (Mt 4:10; Lu 4:8) Maigapu iti naisangsangayan a tulagda ken Jehova a Dios, naited koma kadagiti Judio ti pribilehio a panangipaay iti sagrado a panagserbi kas nayanak iti espiritu nga annak ti Dios ken kamkameng ti “maysa a naarian a kinapadi.” Ngem napukaw ti kaaduan daytoy a pribilehio gapu iti saanda a panamati ken Kristo Jesus. (Ro 9:3-5, 30-33; 1Pe 2:4-10) Impagarup ti adu kadakuada, kas iti Fariseo a ni Saulo sakbay a nagbalin a Kristiano, a mangipapaayda iti sagrado a panagserbi iti Dios babaen ti panangidadanesda kadagiti pasurot ni Kristo.​—Jn 16:2; Ara 26:9-11; Ga 1:13, 14.