SATRAPA
Maysa nga agturay, wenno gobernador ti maysa a probinsia, kadagiti imperio ti Babilonia ken Persia a dinutokan ti ari kas kangrunaan nga agturay iti maysa a masaksakupan a distrito. Dinakamat ni Daniel nga agserserbi dagiti satrapa ken Nabucodonosor iti Imperio ti Babilonia. (Da 3:1-3) Kalpasan a naparmek ti Babilonia iti im-ima dagiti Medo ken Persiano, nangisaad ni Dario a Medo iti 120 a satrapa a mamangulo iti intero a pagarianna. (Da 6:1) Nakikomunikar ni Esdras kadagiti satrapa idi tiempo ni Ari Artaxerxes ti Persia. (Esd 8:36) Idi kaaldawan da Ester ken Mardokeo, tinarawidwidan dagiti satrapa ti 127 a masaksakupan a distrito iti babaen ni Asuero nga ari ti Persia. (Est 1:1) Yantangay isuda dagiti opisial a pannakabagi ti ari, manungsungbatda kenkuana ken nawayada nga umasideg kenkuana. Gapuna, dakkel ti impluensiada ken autoridadda kas sibil ken napolitikaan a panguluen. Nagsingirda kadagiti buis ken inyentregada ti naikeddeng nga impuesto iti naarian a palasio.
Kas maysa kadagiti tallo a nangato nga opisial a mamangulo kadagiti 120 a satrapa iti babaen ni Dario, nagbalin a naisalsalumina ni Daniel nga uray la pinanggep ti ari a pagbalinen isuna a mamangulo iti intero a pagarian. Agsipud ta umapal kenkuana dagiti opisial ken dagiti satrapa, nagkukumplotda a mangipaipisok ken Daniel iti abut dagiti leon. Saan nga ibaga ti Biblia no mano kadagita a satrapa ti personal a napan iti ari ken nangidatag iti pammabasol. Ngem ni Jehova adda idi ken Daniel, iti kasta imbaonna ti anghelna tapno pagkaemenna ti ngiwngiwat dagiti leon. Kalpasanna, dagitoy nga opisial a nangpardaya ken Daniel, agraman ti assawada ken annakda, ket impaipisok ni Dario iti abut tapno papatayen ida dagiti leon.—Da 6:1-24.
Kunaen ti libro a History of the Persian Empire maipapan iti pannakaorganisar dagiti satrapa iti sidong ni Ciro a Persiano: “Ti tunggal [probinsia] ket inturayan ti maysa a satrapa a ti titulona literal a kaipapananna ti ‘manangsalaknib iti Pagarian.’ Kas pannakabagi ti maysa nga ari nga agturturay iti nakalawlawa a teritoria, isu a mismo ket monarka nga addaan iti bassit a palasio. Saanna laeng a tinarawidwidan ti ar-aramid dagiti umili no di ket komandante pay ti binukelna a buyot. No adda mangtawid iti akemna, nagbalin a pangta dayta iti sentral nga autoridad. Tapno mapagballigian daytoy a pangta, nayussuat ti sumagmamano a panagbantay; ti sekretariona, ti kangrunaan nga opisialna iti pinansial, ken ti heneral nga agay-aywan iti garison a nakapuesto iti sarikedked ti tunggal kabesera ti satrapa ket direkta a bilinen ti naindaklan nga ari ken personal a padamaganda ti ari. Ad-adda pay nga epektibo ti panagbantay ti ‘pannakamata ti ari’ (wenno ‘pannakalapayag ti ari’ wenno ‘mensahero ti ari’), [maysa nga opisial] a tinawen a nangaramid iti naannad a panangsukimat iti tunggal probinsia.”—Ni A. T. Olmstead, 1948, p. 59.