SENE

“Maysa a napasdok a bato a kasla ngipen [ti langana]” a sisasango iti Geba ken adda iti abagatan ti sabali pay a napasdok a bato a naawagan iti Bozez. Dagitoy a dua a napasdok a bato ket nagsaad iti nagbaetan ti Micmas ken Geba ken naitampokda iti salaysay mainaig iti iraraut ni Jonatan kadagiti Filisteo. (1Sm 14:4, 5, 13) Saan a masinunuo ita ti ayan dagitoy a napasdok a bato, ngem ibilang ti kaaduan a dagita ket paset ti napasdok a rangrangkis iti igid ti Wadi Suweinit (Nahal Mikhmas), nga adda iti nagbaetan ti Micmas ken Geba.​—Kitaenyo ti BOZEZ.