SEFAR

Maysa a pagpatinggaan ti teritoria a nagnaedan dagiti kaputotan ni Joctan. Kunaen ti Biblia: “Ket ti lugar a pagnanaedanda sinaklawna manipud Mesa agingga iti Sefar, ti nakabambantay a rehion iti Daya.” (Ge 10:29, 30) Ti maysa a maikunkuna nga ayanna ket ti Zafar (sigud a kabesera ti Himyarita nga ar-ari) idiay Yemen, agarup 160 km (100 mi) iti amianan a daya ti makin-abagatan nga ungto ti Nalabaga a Baybay. Ti sabali pay a maibagbaga a lugar ket isu ti maysa a siudad iti kosta ti Mahra, iti Baybay ti Arabia. Ngem kaskasdi a di masinunuo ti eksakto nga ayan ti nagkauna a Sefar.