SAARAIM

[Doble a Ruangan].

1. Maysa a siudad ti Juda iti Sefela. (Jos 15:20, 33, 36) Kalpasan ti panangparmek ni David ken Goliat ken gapu iti ikakamat dagiti Israelita, nagkaiwara dagiti napapatay a Filisteo manipud ‘Saaraim agingga iti Gat ken Ekron.’ (1Sm 17:52) Adda ti Saaraim iti kabangibang ti “nababa a tanap ti Elah” (ti es-Sant [ʽEmeq ha-ʼEla]) ken Azeca (Tell Zakariyeh [Tel ʽAzeqa]). (Jos 15:35; 1Sm 17:1, 2) Saan nga espesipiko a masinunuo ti ayan daytoy a lugar.

2. Maysa a siudad ti Simeon. (1Cr 4:24, 31) Nalawag nga isu met laeng ti Silhim (Jos 15:32) ken Saruhen. (Jos 19:6) Nupay di sigurado, maikunkuna nga isu ti Tell el-Farʽah (Tel Sharuhen), agarup 35 km (22 mi) iti laud ti Beer-seba.