SIDRAC

Ti Babiloniko a nagan ti maysa a destiero a Judio a naital-o iti nangato a saad iti gobierno ti Babilonia. Da Sidrac, Mesac, ken Abednego​—ti tallo a kakadua ni Daniel​—ket kanayon a madakamat nga agkakadua. Kanayon a ni Sidrac ti umuna a nailista, nalabit gapu ta ti katupag ti nagnaganda iti Hebreo​—Hananias, Misael, ken Azarias​—ket kanayon nga agparang sigun iti panagsasaganad ti alpabeto dagiti Hebreo a letra. Naipanagan kadakuada dagitoy a Babiloniko a nagan idi naipanda idiay Babilonia. Agsipud ta napaliiw nga awananda iti pakapilawan ken nataraki ken nasaririt dagitoy nga agtutubo, naipaayanda iti pannakasanay. Iti panagngudo ti tallo a tawen a panagadalda, nasarakan a maminsangapulo a nalalaing da Sidrac, Mesac, ken Abednego ngem kadagiti masirib a lallaki ti Babilonia. Pudno unay a bembendisionan ida ni Jehova, a ti maysa a makagapu ket ti natibker a takderda a saan a mangmulit iti bagbagida kadagiti naimas a makmakan iti Babilonia. (Da 1:3-20) Ti simmaganad a nairekord a pannakadutokda ket ti panangtarawidwidda iti masaksakupan a distrito ti Babilonia. (Da 2:49) Temporario a napukawda ti pabor ti ari idi nagkedkedda nga agruknoy iti dakkel a ladawan nga imbangonna, ngem kalpasan nga inruar ida ni Jehova iti umap-apuy nga urno a saanda a nadangran, naisublida iti sigud a saadda.​—Da 3.