SEBAT

Ti nagan ti maika-11 a lunar a bulan iti sagrado a kalendario dagiti Judio kalpasan ti pannakaidestiero, ngem maikalima iti sekular a kalendario. (Zac 1:7; De 1:3; 1Cr 27:14) Kaibatoganna ti sumagmamano a paset ti Enero agingga iti nasapa a paset ti Pebrero. Di masinunuo ti kaipapanan dayta a nagan.

Mangrugi daytoy a bulan iti katengngaan ti panawen ti lam-ek, iti tiempo a malmalpasen ti napipigsa a tudo ngem panawen pay laeng ti panagtutudo. Agarup 7°C. (45°F.) ti promedio a temperatura idiay Jerusalem bayat daytoy a bulan ken agarup sangapulo a degree a nangatngato ti temperatura iti igid ti Baybay Mediteraneo. Ti arindaraen ken puraw a sabsabong ti kayo nga almendro ti kaunaan a lumtaw iti panagngudo ti panawen ti lam-ek ken dayta ti mangipalnaad iti idadateng ti primavera.

Iti rekord ti Biblia, awan ti aniaman a piesta a narambakan iti bulan ti Sebat.