SHIK

Titulo a gagangay a nayawag iti papanguluen ti tribu dagiti Edomita ken Horeo, ti annak ni Esau ken ti annak ni Seir a Horeo. (Ex 15:15) Iti Hebreo, ti awag ket ʼal·luphʹ, kaipapananna ti “panguluen,” “mangidadaulo iti sangaribu.” (Kitaenyo ti Ge 36:15, Rbi8 ftn.) Ti kadaanan nga awag dagiti Edomita ken Horeo ket tumupag iti titulo a “shik” nga isu ti awag dagiti Bedouin ita kadagiti panguluen ti tribuda. Iti dadduma a patarus ti Biblia, naaramat dagiti titulo a “panguluen” ken “duke” imbes a “shik.”

Pito a shik dagiti Horeo ti nailanad, “annak ni Seir” amin. (Ge 36:20, 21, 29, 30) Dagiti shik ti Edom nabatad a 14 ti bilangda: pito nga appoko manipud iti inauna ni Esau a ni Elifaz nga anak ni asawana nga Ada, uppat nga appoko manipud iti anakna a ni Reuel nga anak ni asawana a Basemat, ken tallo kadagiti annakna babaen ken asawana nga Oholibama. (Ge 36:15-19) Nupay kasta, mapagduaduaan no rumbeng nga ibilang kadagita ni shik Kore a karaman kadagiti annak ni Elifaz. No biddut ti eskriba ti pannakairaman ni shik Kore, kas pagarupen ti sumagmamano, 13 laeng ngarud ti shik ti Edom. (Ge 36:16, Rbi8 ftn) Dagiti sangkaputotan a nagtaud kadagiti shik napanagananda iti nagnagan dagiti shik.

Iti Genesis 36:40-43 ken 1 Cronicas 1:51-54 adda naipaay a naiduma a listaan “dagiti shik ni Esau [Edom].” Mabalin a naud-udi a shik dagitoy ngem kadagidiay immun-una a nailanad. Nupay kasta patien ti sumagmamano a komentarista a dagitoy ket saan a nagnagan ti tattao, no di ket dagiti siudad wenno rehion a nakaisentruan ti panagturay dagiti nagduduma a shik. Kas mangpasingked itoy a panangmatmat, kastoy ti mabasa iti patarus ti Jewish Publication Society: “ti panguluen ti Timna, ti panguluen ti Alva,” ken dadduma pay.