SIBA

[Sapata; wenno, Pito].

Ti bubon a kinali, wenno kinali manen, dagiti adipen ni Isaac idiay Beer-seba. (Ge 26:32, 33; idiligyo ti Ge 26:18.) Impadamagda nga adda danum a nasarakanda sadiay kalpasan a nangaramidda iti tulag ti kappia ken Abimelec nga ari ti Gerar; ngarud, ni Isaac pinanagananna ti bubon iti “Siba” (a tumukoy iti maysa a sapata wenno sasao a nasapataan iti pito a banag). (Ge 26:26-33) Adda met kasta nga umas-asping a pannakitulag ni Abraham ken Abimelec (mabalin a daytoy a Filisteo nga ari wenno ti sabali pay a tao a kasta met laeng ti nagan wenno titulona). Iti daydi a gundaway, inawat ni Abimelec ti pito a kabaian a kordero manipud ken Abraham kas pammaneknek iti karbengan ti patriarka mainaig iti mapagsusupiatan a bubon, nalabit a ti met laeng a bubon a pinanaganan ni Isaac iti “Siba” idi agangay. Babaen ti panangusar ni Isaac iti “Siba” (sabali pay a porma ti nagan a Sheba), nalawag met a tagtaginayonenna ti nagan a “Beer-seba,” ti sigud nga impanagan ni Abraham iti daytoy a disso.​—Ge 21:22-32; kitaenyo ti BEER-SEBA.